Еженедельная региональная аграрная общественно-политическая газета, г.Костанай, ул.Тәуелсіздік 83, Офис 621, 54-81-20, 54-08-30 kostanay-agro@mail.ru

Мы в соцсетях

Áleýmettik tólem kim úmitti?

Karantın kezinde engizilgen shekteýlerge baılanysty tabysynan aıyrylǵan azamattarǵa tólenetin áleýmettik járdemaqyǵa ótinimder qabyldaý 17 shildeden bastalǵan edi. Atalǵan kómekten úmitti oblys turǵyndary alǵashqy apta ishinde-aq belsendilik tanytqan. Bul jóninde Óńirlik komýnıkasıa qyzmetinde ótken brıfıńte aıtyldy.

Áleýmettik tólemge ótinim berý burynǵydan ońtaılana túsken. Iaǵnı, qazir SMS-habarlamalar arqyly qabyldaıdy. 20 shildeden bastap tólem alýdyń basqa joldary engizilgen.

«Siz bes jolmen ótinim bere alasyz. Birinshiden, elektrondy úkimet portaly arqyly jiberýge bolady. Ekinshi ádis – jedelhatpen, úshinshi tásil – ekinshi deńgeıli bankterdiń mobıldi qosymshalarynyń kómegimen. Sondaı-aq, tólemdi proaktıvti formatpen alýǵa bolady. Besinshi ádis – 42500.enbek.kz portaly arqyly», — dep atap ótti brıfıńte Qostanaı oblysy ákimdiginiń jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Aıda Qusaıynova.

Bir apta ishinde osy ádisterdi paıdalana otyryp, oblys turǵyndary 51,5 myń ótinim joldady. Solardyń jartysyna jýyǵy mártebesin SMS-habarlamalar arqyly rastaǵan. Ótinimderdiń basym bóligi maquldanyp, bul sanatqa tek 190 adam sáıkes kelmepti.

«Ótinim qabyldanbaı jatsa, onyń negizgi sebepteri – jumyssyz retinde esh jerde tirkelmeýi nemese basqa tabys kóziniń bolýy. Sonymen birge, áleýmettik saqtandyrý qorynan belsendi tólem júrgizilip, respýblıkalyq búdjetten basqa da alymdar alyp júrgen azamattarǵa 42500 birelmeıdi», — dedi Memlekettik áleýmettik saqtandyrý qory fılıalynyń bas mamany Sholpan Seralınova.

El arasynda «jumyssyz qaldym, maǵan nege bermeıdi?» dep surap jatatyndar bar. Memlekettik áleýmettik qory bas mamanynyń aıtýynsha, ondaı azamattar jumyspen qamtý ortalyqtaryna esepke turýy tıis. Jumyspen qamtýdy úılestirý jáne áleýmettik baǵdarlamalar basqarmasynyń málimetinshe, 51,5 myń adamnyń 49 337-sine tólem taǵaıyndalǵan. Olarǵa aýdarylǵan qarjy kólemi 2 mıllıard teńgeden asady. Qazir ótinimderdi qabyldaý jalǵasyp jatyr. Onyń sońǵy ýaqyty ázirge 1 qyrkúıekke deıin dep belgilenip otyr.