Еженедельная региональная аграрная общественно-политическая газета, г.Костанай, ул.Тәуелсіздік 83, Офис 623, 54-08-30, 91-78-51 kostanay-agro@mail.ru

Мы в соцсетях

Prezıdent dıqandardy quttyqtady

Memleket basshysy Qasym-Jomart Toqaevtyń astyq jınaý naýqanynyń tabysty aıaqtalýyna baılanysty qazaqstandyq dıqandarǵa quttyqtaý lebizin joldady. QR Prezıdentiniń resmı saıtyna jarıalanǵan quttyqtaý mátinin nazarlaryńyzǵa usynamyz.

«Qurmetti aýyl eńbekkerleri! Barshańyzdy astyq jınaý naýqanynyń tabysty aıaqtalýymen quttyqtaımyn! Bıylǵy egin egý naýqany koronavırýs pandemıasy saldarynan elimizde jarıalanǵan tótenshe jaǵdaıǵa baılanysty qıyn jaǵdaıda júrgizildi. Negizgi astyq ósiretin oblystarda jaz maýsymy jaýyn-shashynsyz, qurǵaq boldy. Kúrdeli jaǵdaıda jumys isteýge týra keldi. Soǵan qaramastan, elimizdiń eginshileri uıymshyldyq tanytyp, aýyl sharýashylyǵy daqyldaryn egýdi ýaqytyly aıaqtady. Nátıjesinde qambalarymyz astyqqa toldy.

Búginde el óńirlerinde 20 mıllıon tonna kóleminde astyq jınaldy. Bul elimizdiń ishki qajettiligin tolyq qamtamasyz etedi, sondaı-aq, eksporttyq áleýetimizdi arttyryp, Qazaqstannyń astyq derjavasy mártebesin saqtap qalýyna múmkindik beredi. Egin jınaý naýqany bir aıǵa erte aıaqtalyp, qoımalarǵa eki ese kóp astyq jınaldy. Bıylǵy jınalǵan astyqtyń sapasy joǵary jáne barlyq talaptarǵa saı keledi.

Qurmetti dıqandar, sizderdiń qajyrly eńbekterińizdiń, agrotehnologıany qatań saqtaǵandaryńyzdyń jáne barlyq kúsh-jigerlerińizdi jumyldyra bilgenderińizdiń arqasynda osyndaı nátıjege qol jetkizildi. Aýyl eńbekkerleriniń eńbeksúıgishtigi men tabandylyǵy aýyldy qaıta túletýge, sharýalardyń turmysyn jaqsartýǵa zor yqpal etti. Agroónerkásip kesheniniń mindetterin tabysty sheshýdiń negizi sizderdiń joǵary biliktilikterińizge, tańdaǵan mamandyqtaryńyz ben dańqty dástúrge degen adaldyqtaryńyzda dep senimdi túrde aıtýǵa bolady.

Qajyrly eńbegi men dıqanshylyq mindetke degen adaldyǵy úshin barlyq aýyl eńbekkerlerine, ardagerlerge, óndiris ozattaryna rızashylyǵymdy bildiremin! Elimizdi órkendetý jolynda jańa tabystarǵa jete berińizder! Sizderge zor densaýlyq, baq-bereke tileımin!».

Qostanaı oblysynyń dıqandary alqaptaǵy astyqty shashaýsyz jınap aldy. Bıylǵy aýa raıy dándi daqyldyń oıdaǵydaı ósip-jetilýine qolaıly bola qoımady. Jaz maýsymynda aptalap aptap ystyq turyp aldy. Ótkinshi nóserdiń órekpip kelip anda-sanda bir búrkip ótken bolmasa, mandytyp jańbyr da jaýmaı qoıdy.

«Soǵan qaramastan, salany sıfrlandyrý arqyly jáne jetilgen jer ıgerý tehnologıasynyń nátıjesinde jer qyrtysynda astyqqa jetkilikti mólsherde ylǵal saqtalyp, oblystyń aýylsharýashylyq qurylymdary 4,1 mln tonna astyq bastyryp aldy. Bıylǵy ónim shyǵymy ortasha eseppen gektaryna 10,2 sentnerden keledi. Jalpy ónimniń kólemi byltyrǵy kórsetkishten 1 mln tonna artyq», dep málimdedi aýyl sharýashylyǵy basqarmasy.

Búginge deıin oblys aýmaǵyna ornalasqan astyq qabyldaý mekemelerine 871 myń tonna bıdaı kelip túsken. Onyń 82%-y 3-surypty bıdaı. Elevatorlarǵa jınalǵan bıdaıdyń 60%-dan astamynyń qamyrlylyǵy 28% jáne odan joǵary.

Oblysta óndiristi sıfrlandyrý men tehnologıalyq úderisterdi avtomattandyrý arqyly aýyl sharýashylyǵy ónimderin óńdeý kásiporyndary jańǵyrtylyp, iri zamanaýı jańa óńdeý keshenderi iske qosylýda. Osyǵan baılanysty bıyl orylǵan 4,1 mln tonna astyqtyń 60%-dan astamy, ıaǵnı 2,5 mln tonna bıdaı óńdeýge jiberilip, shetelge 1,2 mln tonna un eksporttaý josparlanyp otyr.

Aýyl sharýashylyǵy basqarmasynyń málimetinshe, qazir sharýashylyqtar «Azyq-túlik korporasıasy» AQ-na forvardyq satyp alý boıynsha bıdaı tapsyryp jatyr. Aldaǵy kóktemgi egis naýqanyna qajetti 530 myń tonna bıdaı tuqymy daıyn. Dıqandar endi kúzdigin qamdaýǵa kirisip, qazirdiń ózinde 1 mln gektardan astam kúzdik alqapqa óńdeý júrgizgen.