Qostanaı oblysy ákimdiginiń tilderdi damytý basqarmasynyń muryndyq bolýymen Chelábi oblysyndaǵy Qazaq dıasporasynyń ókilderi Qostanaıǵa keldi. Maqsat – qazaq dıasporasy ókilderiniń arasynda qazaq tilin oqytý boıynsha ózara tájirıbe almasyp, mádenı jáne áleýmettik-gýmanıtarlyq salada shekaralyq yntymaqtastyqty odan ári damytý.

Kórshi elden kelgen bir top delegasıa «Qazaq dıasporasyna ana tilin úıretý boıynsha uıymdastyrýshylyq-ádistemelik kómek kórsetý» atty semınar trenıńke qatysyp, qostanaılyq áriptesterimen tájirıbe almasty. Atalmysh sharaǵa Chelábi oblysyndaǵy «Jaqsylyq» qazaq ulttyq mádenı ortalyǵynyń basshysy, Troısk qalasy men Verhne-Ýralsk, Chesmen, Agapov, Ýısk aýdandaryndaǵy qazaq dıasporasynyń ókilderi, Qostanaı oblystyq Qazaqstan halqy Asambleıasynyń ókili, «Otandastar Qory» KEAQ mádenı-gýmanıtarlyq jobalar departamentiniń menejeri, tilderdi oqytý ortalyqtarynyń basshylary jáne oqytýshylary, basqarma qyzmetkerleri qatysty.

–Men turyp jatqan Chelábi oblysynyń Verhne-Ýralsk aýdanynda úsh jarym myńǵa jýyq qazaq bar. Alaıda, mektepter men balabaqshalardyń deni orys tilinde. Biraq qazaq tilin úırenýge degen qulshynystary bar. Osyndaı semınar-trenıngke qatysý arqyly biz bilimimizdi odan ári jetildirip, jas urpaqqa ana tilin úıretkimiz keledi, – deıdi Chelábi oblysy, Verhne-Ýralsk aýdanynyń qazaq tili pániniń muǵalimi Altynshash Tasqaranova.