Bıyl «Baqytty otbasy» baǵdarlamasy aıasynda Qostanaıda 39 otbasy baspanaly bolǵan. Solardyń biri – bes balanyń anasy Aqjan Dosqojınova. Oblystyq balalar aýrýhanasynda sanıtar-býfetshi bolyp jumys isteıtin ol úsh bólmeli páterge ıe boldy.

Kóp balaly anaǵa bir aı buryn «Iýbıleınyı» shaǵyn aýdanynan eki páter usynylǵan eken. Biraq odan bas tartyp, balalary oqyp jatqan mekteptiń dál janyndaǵy úıdi ózi tańdapty.

— 10 jyldaı páter jaldap, bosaǵa tozdyryp kóship júrdim. Balam kóp bolǵannan keıin kóbi páterine kirgizgisi kelmeıdi. Mine, «Baqytty otbasy» baǵdarlamasynyń arqasynda bul aýyrtpalyqtan da qutyldyq. Ár adam úshin óz úıi ystyq qoı. Otan otbasynan bastalady. Balalarym da baqytty. Úlkeni onda, esimi — Azamat. Ázıla – toǵyzda. Narǵyz birinshi klasta. Eki kishkentaıym balabaqshaǵa barady. Aı saıyn 120-130 myń teńge ataýly kómek alyp turamyn. Óz aılyǵym bar. Munyń syrtynda kóp balaly ana retinde beriletin 10 myń teńge bar. Qazir jaǵdaıymyz jaqsy. Osy qamqorlyqtyń bári Elbasymyzdyń 5 áleýmettik bastamasynyń jemisi dep oılaımyn, — deıdi baqytty ana.