«Rýhanı jańǵyrý» baǵdarlamasyn júzege asyrý sheńberinde jáne «Jastar jyly» aıasynda oblystyq tarıhı-ólketaný mýzeıinde A.Nıkıforov atyndaǵy kórkem sýret mektebi oqýshylarynyń dıplomdyq jumystary usynylǵan kórme ótti.

Maqsat – daryndy jas sýretshilerdi qoldaý jáne olardy anyqtaý, Qazaqstannyń qazirgi zamanǵy beıneleý ónerin nasıhattaý. Atalmysh sharaǵa kórkem sýret mektebiniń oqýshylary men oqytýshylary, zıaly qaýym ókilderi, sýretshiler, mádenıet qyzmetkerleri, beıneleý ónerine qyzyǵýshylar qatysty.

– Jastar jylynda jastardyń shyǵarmashylyǵyna erekshe kóńil bólinip, qoldaý kórsetilip jatyr. Elbasy qazirgi ýaqytty batyl jáne daryndy adamdardyń ýaqyty dep atap kórsetti. «Jastar jyly» aıasynda uıymdastyrylyp otyrǵan kórmeniń basty maqsaty — jas sýretshilerdiń shyǵarmashylyǵy men kórkemdik bilim berý qurylymdaryn dáripteý, – deıdi shara uıymdastyrýshylary.

Kórmege ár túrli taqyryptar men tehnıkada salynǵan 100-den astam týyndylar qoıyldy. Balalar shyǵarmashylyǵy natúrmort, peızaj, portret, tarıhı, mıfologıalyq, turmystyq jáne t.b. túrli janrlardaǵy túrli-tústi boıaýlarymen, jastyq qıal men shabyttan týyndaǵan erekshe týyndylarymen tań qaldyrdy. Oqýshylarǵa darynyn ashýǵa mektep bitirýshi synyptardyń oqytýshylary kómektesken.