Еженедельная региональная аграрная общественно-политическая газета, г.Костанай, ул.Тәуелсіздік 83, Офис 621, 54-81-20, 54-08-30 kostanay-agro@mail.ru

Мы в соцсетях

Polısıa karantın tártibin túsindirdi

Qostanaı oblysynda búgin túngi 00.00-den bastap kúshine enetin karantın rejimin 29 tosqaýyl beketi, 33 mobıldi patrúl jasaǵy jáne 300-den astam jaıaý polıseı qamtamasyz etedi.

Alǵashqy eki kún boıy polıseıler turǵyndarǵa karantın erejesin buzbaý týraly eskertý, túsindirý jumystaryn atqarady. Tártip buzǵandar úshinshi kúnnen bastap aıyppul túrindegi ákimshilik jazaǵa tartyla bastaıdy.

Aımaqqa tótenshe jaǵdaı rejimi engizilgeli 408 adam ákimshilik jaýapkershilikke tartylyp, 40 tártip buzýshy qamaýǵa alynǵan. Bul týraly jergilikti polısıa basqarmasynyń bastyǵy Qurmet Májikenov aıtty. Patrúl jasaqtary kólik qozǵalysy men turǵyndardyń júrip-turýyna ruqsat etilgen málimetter bazasy qondyrylǵan planshettermen qamtamasyz etildi.
Polısıa saıabaqqa barýshylarǵa erekshe toqtalyp, shekteý tártibine saı, 1 mamyrǵa deıin saıabaqqa barýǵa tyıym salynǵanyn qadap eskertti. Alaıda jumys ornyna barýǵa shekteý joq. Jumysqa jetip alý úshin azamattardyń qolynda jumys ornynan berilgen anyqtama bolýy kerek. Patrúl toqtatqan jaǵdaıda, azamat naqty qaıda bara jatqanyn anyqtap aıtyp, onyń qajettiligin negizdeýi shart.

Sondaı-aq, jumysyn toqtatpaıtyn kásiporyndar jergilikti ákimdikterdiń kásipkerlikti qoldaý bólimderine ótinish jazyp, kólik qozǵalysyna ruqsat ala alady. Ákimdik bul málimetti polısıaǵa jiberedi.

Taksıler qala ishinde ǵana júre alady. Qala syrtyna shyǵýǵa ruqsat joq. Al qoǵamdyq kólikter múlde toqtaıdy. Karantın rejiminde jumys isteıtin iri kásiporyndarǵa qala ishinde jumysshylaryn avtobýspen tasymaldaýǵa ruqsat etilýi múmkin. Barlyq dúkender saǵat 10.00-de ashylyp, keshki 20.00-ge deıin jumysyn toqtatýy tıis.