Qostanaı oblysynyń ákimdiginde koronavırýstyq ınfeksıanyń taralýyna jol bermeý jónindegi jedel shtabtyń kezekti otyrysy ótti, dep habarlaıdy Qostanaı oblysy ákiminiń baspasóz qyzmeti.

Jıyn barysynda Oblys ákimi Arhımed Muhambetov sońǵy kúnderi koronovırýstyq ınfeksıa boıynsha epıdemıologıalyq jaǵdaıdyń nasharlaǵanyn atap ótti. Karantındik sharalardy saqtaý monıtorıńiniń nátıjeleri boıynsha, sondaı-aq oblys aýmaǵynda KVI indetiniń ósýin eskere otyryp, jedel shtab osy jyldyń 18-30 maýsym aralyǵynda shekteý sharalaryn engizý jóninde sheshim qabyldady.

«Taldaý kórsetkendeı ınfeksıanyń taralýyna áleýmettik, otbasylyq baılanystardyń artýy sebep bolyp otyr. Iaǵnı adamdar maskany kımeıdi, qashyqtyqty, jeke gıgıenany saqtamaıdy. Sonymen qatar, óz qyzmetin qaıta bastaǵan nysandarda sanıtarlyq-dezınfeksıalyq rejım durys oryndalmaǵan. Sondaı-aq kásipkerlerge úlken jaýapkershilik júkteledi. Olar qyzmetkerlerin qolǵappen, maskalarmen jáne basqa da qorǵanys quraldarymen qamtamasyz etý qajet», — dedi Arhımed Muhambetov.

Jalpy Qostanaı oblysynyń aýmaǵynda COVID-19 ınfeksıasynyń 247 jaǵdaıy tirkelgen. Sonymen,oblys aýmaǵynda kelesi shekteý sharalary engizildi:

1. Osy jyldyń 19 maýsymynda saǵat 00.00 bastap 3 sanıtarlyq beket ornatylady. Olar: «Qostanaı – Áýlıekól – Surǵan», «Qostanaı – Rýdnyı», «Arqalyq – Amantoǵaı» avtojoldarynda;

2. Atraksıondar men sýburqaqtardyń, úrlemeli konstrýksıalardyń (batýttar) jumysyna tyıym salý;

3. Karaoke barlardyń, bılárd, boýlıń ortalyqtarynyń, tatý-salondardyń, massaj salondarynyń jumysyna tyıym salý;

4. HQKO-ǵa onlaın rejıminde qyzmet kórsetýge kóshý, onlaın rejıminde júzege asyrý múmkin emes qyzmetterdi jazý boıynsha saǵat 10-00-den 18-00-ge deıin;

5. Sulýlyq salondarynyń, shashtarazdardyń jumysyn tek jazý boıynsha 10-00-den 18-00-ge deıin shekteý;

6. Bilim berý ortalyqtarynyń jumysy, úıirmeler, balalardy damytý ortalyqtary 9-00-den 16-00-ge deıin (toltyrylýy 15 adamnan artyq emes);

7. Ónerkásip tobynyń taýarlaryn ótkizetin obektilerdiń jumysyn 20-00-ge deıin shekteý;

8. Azyq-túliktik jáne azyq-túliktik emes bazarlardyń jumysyn 10-00-den 16-00-ge deıin shekteý;

9. Memlekettik qyzmetshilerdiń 80%-yn «qashyqtyqtan» jumys nysanyna aýystyrý, selektorlyq rejımde jınalystar, keńester, semınarlar, konferensıalar jáne beıne konferensıalar ótkizý.

Óńir basshysy kezekti ret oblys turǵyndaryn jeke qaýipsizdik sharalaryn saqtaýǵa shaqyrdy. Buǵan deıin Qostanaı oblysynyń trassalaryna blokpostar ornatylyp jatqany habarlanǵan bolatyn.