Bıyl Qostanaı oblysynda avtomobıl joldary men eldi mekenderdegi kóshelerdi jóndeýge jalpy somasy 43 mlrd 912 mln teńge qarjy bólinip, 295 jobany júzege asyrylyp jatyr.
Nátıjesinde aımaqta jalpy uzyndyǵy 597,7 shaqyrym bolatyn avtomobıl joly jóndeledi. Munyń syrtynda, bıyl aýyldyq eldi mekenderde júrip jatqan jol jóndeý jumystary erekshe qarqyndy. Jaz bastalǵaly Amankeldi, Altynsarın, Áýlıekól, Qarabalyq, Qarasý, Qostanaı aýdandaryndaǵy kúre joldar ońdalyp, buryn-sońdy asfált kórmegen kóshelerge tas tóselip jatyr.
Qazir Qostanaı men Tobyl qalasyn jalǵap jatqan oblystyq mańyzy bar avtomobıl jolynyń boıynda jańa kópir salynyp jatyr. Bul mańda qazir jergilikti turǵyndar «koreı kópiri» dep atap ketken kóne kópir tur. Odan birneshe ese keń ári qaýipsizdik talaptary tolyq eskerilgen zamanaýı jańa kópir eski kópirdiń oń jaq qaptalynan túsedi. Qazir Tobyl ózeniniń ústinde qurylys qaınap jatyr. Bas merdiger – «Qazaqjolqurylys» JShS. Seriktestik qurylys jumystaryn jaz shyǵa bastap ketti.
Jobaǵa sáıkes kópirdiń qarama-qarsy baǵyttaǵy kólik joly jolaqtary tórteý bolady. Jospar boıynsha nysan bastapqy ornynan edáýir ońǵa qaraı jyljıdy. Burynǵy tar ótkel sekildi eski kópirdiń burylys-bultarysy kóp edi. Jańa kópir oblys ortalyǵynyń shyǵys tusynan shyǵatyn Kóbeev kóshesine tik jalǵasyp ketetin bolady.
– Joba ınfraqurylymdy damytýdyń 2020-2025 jyldarǵa arnalǵan «Nurly jol» memlekettik baǵdarlamasy aıasynda júzege asyrylyp jatyr. Quny – 4,4 mlrd teńge. Kópir múlde jańa keıipke enedi desek bolady. Bıyl mundaǵy jeliler aýystyrylyp, kópirge 140 tirek tasy ornatylady. Eki qalany qosatyn kópirdiń uzyndyǵy 261 metr bolady. Eger buryn eski kópirdiń eni 10 metr bolsa, jańasynyń eni 24,5 metrge deıin keńeıtiledi. Jaıaý júrginshilerge arnalǵan trotýar salynyp, dıodty jaryqshamdar ornatylady. Buǵan qosa qaýipsizdik sharalaryn qamtamasyz etý úshin beınebaqylaý kameralaryn qoıý qarastyrylǵan. Kópir qurylysyn 2021 jyldyń sońyna taman aıaqtaýdy josparlap otyrmyz, – dedi jolaýshylar kóligi jáne avtomobıl joldary basqarmasy basshysynyń orynbasary Alekseı Kostúkov.
Bıyl jaz oblystyń ońtústik aýdandaryndaǵy eldi mekenderdi jalǵaıtyn Áýlıekól-Jaldama avtomobıl joly da ortasha jóndeýden ótip jatyr. Kúre joldy qalpyna keltirýge 3,9 mlrd teńge bólingen. 100 shaqyrymdyq avtokólik jolyna jóndeý júrgizip jatqan merdiger kompanıa nysandy kúzge deıin aıaqtaýdy kózdep otyr. Sondaı-aq kópten kútim kórmeı oı-shuqyry kóbeıip tozyp ketken «Qarabutaq-Qostanaı» tas joly jóndelýde. Qazir Rýdnyı qalasynan Denısov aýylyna deıingi aralyqta jol-qurylys jumystary júrgizip jatyr.
