Eldegi sanıtarlyq-epıdemıologıalyq jaǵdaıdy eskere otyryp, 2020-2021 oqý jylynyń bilim berý prosesi birneshe baǵyttar boıynsha uıymdastyrylatyn bolady. Oblys aýmaǵynda 490 mektep jumys isteıdi.
Jańa oqý jylynda oqýshylardyń aldyn ala kontıngenti 108,6 myńnan astam oqýshy men 13 myń pedagogti quraıdy. Birinshi synypqa 12,2 myńnan astam oqýshy qabyldanady dep kútilýde. Oblysta jalpy kontıngenti 18,6 myń oqýshyny (18606) qamtıtyn barlyǵy 330 shaǵyn jınaqtalǵan mektep (67%) bar. Onyń ishinde jalpy kontıngenti 16 myńnan astam oqýshy (16194) bar 265 mektep (mektepterdiń jalpy sanynyń 54%-y) nemese oqýshylardyń jalpy sanynyń 15%-y sanıtarlyq-epıdemıologıalyq qaýipsizdik sharalaryn kúsheıte otyryp, shtattyq rejımde oqıtyn bolady. Arasy 1,5 saǵattyq úzilispen 2 aýysymdy quraıdy. Jeldetý, dezınfeksıalaý, maskalyq rejım engizilip, medısınalyq baqylaý kúsheıtiledi. Mundaı oqytý formaty osy eldi mekenderde qolaıly epıdemıologıalyq jaǵdaı bolǵan kezde múmkin bolatynyn túsiný mańyzdy.
Eger óńirdiń epıdemıologıalyq jaǵdaıy kúrdelenetin bolsa, óńirdiń barlyq mektepteri qashyqtyq rejımge tolyq kóshiriletin bolady. Óńirlik komýnıkasıa ortalyǵynda ótken brıfıńte aldaǵy 2020-2021 oqý jylyna daıyndyq jóninde baıandaǵan Qostanaı oblysynyń ákimi Arhımed Muhambetov osylaı dedi. Jalpy kontıngenti 92,5 myń oqýshyny (85%) qamtıtyn qalǵan 225 (46%) mektepte oqý prosesi qashyqtan uıymdastyrylatyn bolady.
— Bul rette, bastaýysh synyptarda ata-analardyń ótinishteri boıynsha qatań sanıtarlyq sharalardy saqtaı otyryp, tolymdyǵy 15 adamǵa deıin toptarǵa bóle otyryp, kezekshi synyptar jumys isteıdi. Búgingi tańda osyndaı formatta oqý úshin jalpy kontıngenti 27,3 myń oqýshysy nemese tómengi synyp oqýshylarynyń jalpy sanynyń 55% bar 2400-ge jýyq toptyń ashylýy josparlanýda. Osylaısha oblys boıynsha 108 myń oqýshynyń 16 myńy nemese 15% shtattyq rejımde oqytylatyn bolady; 27 myń oqýshy úshin (25%) mektepterde kezekshi synyptar uıymdastyrylatyn bolady; 65 myń oqýshy (60%) ınternet-tuǵyrnamalar men teledıdardy paıdalana otyryp, qashyqtyq formatta oqıtyn bolady, — dedi aımaq basshysy.
Sondaı-aq, Oblys ákimi A.Muhambetovtyń tóraǵalyǵymen ótken jedel shtabtyń otyrysynda karantındik is-sharalardy saqtaý máseleleri qaraldy. Jıyn barysynda óńirdegi sanıtarlyq-epıdemıologıalyq ahýaldyń jaqsarýy, sondaı-aq kásipkerlerdiń ótinishteri eskerile otyryp, aǵymdaǵy jyldyń 10 tamyzynan bastap ınfeksıamen syrqattanýshylyqtyń tómendeýiniń oń serpini saqtalǵan jaǵdaıda karantındik sharalardyń jeńildeýi týraly sheshim qabyldandy:
1.Aýdany 500 sh.m. deıingi azyq-túlik emes dúkenderdiń jumys isteýine ruqsat berý, bul rette kórsetilgen alańnan joǵary obektiler jumysty «klıentke deıin» qaǵıdaty boıynsha ǵana jalǵastyrady;
2.Skverlerdiń, saıabaqtardyń, onyń ishinde olardyń aýmaqtarynda ornalasqan saýda núkteleriniń (atraksıondardyń, balalar oıyn alańdarynyń, batýttardyń, balalar velosıpedterin, balalar mashınalaryn jalǵa berýdi qospaǵanda) qyzmetine ruqsat etilsin. Áleýmettik qashyqtyqty saqtaı otyryp, toptarmen 3 adamnan nemese bir otbasy múshelerinen artyq emes shyǵý;
3.Oblys qalalarynda qoǵamdyq kóliktiń qozǵalys kestesi saǵat 06:00-den 21:00-ge deıin belgilensin. Bıznes sýbektileri karantındik sharalardy buljytpaı saqtaǵan jaǵdaıda ǵana jumys isteı bastaıdy, ol úshin monıtorıńtik toptar aldaǵy 3 kún ishinde KVI aýrýynyń aldyn alý jónindegi talaptardyń saqtalýyna baǵalaý júrgizedi.
-Aǵymdaǵy aptadan bastap biz kásiporyndardaǵy barlyq sanıtarlyq normalardy qoldanystaǵy talaptarǵa sáıkes keltirý boıynsha júıeli daıyndyq jumystaryn (a.j. 17 tamyzǵa deıin) júrgize bastadyq. Bıznes sýbektileri qyzmetiniń bastalýy boıynsha jumys kezeń-kezeńimen júrgiziletin bolady, — dedi oblys ákimi A.Muhambetov.
Otyrys qorytyndysy boıynsha óńir basshysy bas sanıtarlyq dárigerdiń qaýlysyna tıisti ózgerister engizýdi tapsyrdy.
