Aımaqta bilim berý ınfraqurylymyn damytý, jóndeý jumystaryn júrgizý qarqyny jalǵasýda. Zamanaýı mektepterdiń aýqymdy qurylysy júrgizilip jatyr. Aldaǵy qyrkúıek aıynda Áýlıekól aýdanynyń Amanqaraǵaı kentinde 320 oryndyq memlekettik tilde oqytatyn jańa mektep óz esigin ashady.

Sondaı-aq, osy jyldyń sońyna deıin Qostanaı qalasynyń «Iýbıleınyı» shaǵyn aýdanynda 1200 oryndyq mekteptiń jáne Qarasý aýdany Qarasý aýylynda 320 orynǵa arnalǵan mekteptiń qurylysy aıaqtalady.

Óńirlik komýnıkasıa ortalyǵynda ótken brıfıńte aldaǵy 2020-2021 oqý jylyna daıyndyq jóninde baıandaǵan Qostanaı oblysynyń ákimi Arhımed Muhambetov osylaı dedi.

— 131 bilim berý nysanynyń kúrdeli jáne aǵymdaǵy jóndeýlerin iske asyrýǵa teńdessiz soma – 9,2 mlrd teńge bólindi. Bul ótken jylǵy kórsetkishten 2,6 ese kóp (2019 jyly – 3,5 mlrd teńge). Jalpy, barlyq nysandarda jóndeý jumystary kestege sáıkes júrgizilýde. Qazirgi ýaqytta 131 nysannyń 91-i (70%) aıaqtalyp qaldy. Qalǵan jóndeý jumystary 1 qyrkúıekten keıin josparly túrde jalǵasatyn 5 nysandy qospaǵanda (Qostanaı qalasynyń №6, 4, 19 mektepteri, Meńdiqara aýdanynyń Mıhaılov OM, Áýlıekól aýdanynyń Sulýkól OM) oqý jyly bastalǵanǵa deıin aıaqtalady. Osyǵan baılanysty, qalalar men aýdandardyń ákimdikteri oqýshylardy jaqyn ornalasqan mektepterge qaıta bólý nemese qashyqtan oqytýdy jalǵastyrý arqyly jańa oqý jylynyń bastalýyna kedergi keltirmeý boıynsha sharalar ázirledi, — dedi A.Muhambetov.

Sondaı-aq, óńirde bilim berý uıymdaryn beınebaqylaý júıelerimen jabdyqtaý jumystary aıaqtaldy. Oblystyq búdjetten osy maqsatqa 187 mln teńge baǵyttalypty. Búgingi tańda 460 mektep (94%) beınebaqylaý kameralarymen jabdyqtalǵan. 122 memlekettik balabaqshanyń 112-si kameralarmen jabdyqtalǵan. Oqý jyly bastalǵanǵa deıin jumys tolyq kólemde aıaqtalady.