Qostanaı oblysynyń ákimi Arhımed Muhambetov Sybaılas jemqorlyqqa qarsy agenttiktiń bastamasymen ótip jatqan Antikor live jobasy aıasynda sóz sóılep, ony Instargram jelisindegi jeke paraqshasynda jarıalady.

Aımaq basshysy «Sybaılas jemqorlyq biz úshin emes» atty jalpyrespýblıkalyq sharaǵa qoldaý kórsetti. Ákimdikterdi ashyq ári qoljetimdi etý maqsatynda oblysta atqarylyp jatqan sharalar jóninde sóz órbitken óńir basshysy óziniń eńbekaqy mólsherin de atap, aıyna 766 myń teńge jalaqy alatynyn aıtty.

«Jergilikti atqarýshy organdar sybaılas jemqorlyqtyń aldyn alý máselelerine erekshe nazar aýdarýda. Sybaılas jemqorlyq quqyq buzýshylyqtarǵa qarsy is-qımyl jáne aldyn alý jónindegi is-sharalardy aıqyndaıtyn baǵdarlamalyq qujattardy iske asyrý boıynsha sharalar turaqty negizde qabyldanady. «Óńirler – sybaılas jemqorlyqtan ada» jobasyn iske asyrý aıasynda 2018 jyldan bastap «Qostanaı – adaldyq alańy» jobalyq keńsesi jumys isteıdi, onyń maqsaty azamattar úshin kedergisiz jáne jaıly jaǵdaılar jasaý, turmystyq sybaılas jemqorlyqty joıý, sondaı-aq parasattylyq, adaldyq jáne ádildik sıaqty qaǵıdattardy taratý bolyp tabylady. Qurmetti qostanaılyqtar! Eger sizderdi tolǵandyratyn suraqtaryńyz nemese usynystaryńyz bolsa, post túsiniktemelerinde kórsetýdi suraımyn», dedi Arhımed Muhambetov.

Atalǵan aksıanyń bıyl «Adaldyq alańy» jobalyq keńsesiniń bastamasy boıynsha qolǵa alynǵanyn aıta ketken jón. Taıaýda ǵana Qostanaı oblysyna respýblıkalyq keńse basshysy Tólegen Baıǵulov jumys saparymen kelip, qala jáne aýdan ákimderin «Óńirler – sybaılas jemqorlyqtan ada» jobasyna qoldaý kórsetýge shaqyrǵan. Jalpyrespýblıkalyq shara bıylǵy 9-jeltoqsanǵa deıin jalǵasady.