Aldaǵy jyly Qostanaı oblysyna qarasty Qarabalyq aýdanynda jylyna 20 myń tonnaǵa deıin qus etin óndiretin irgeli kásiporyn ashylady.
Poultry-Agro JSHS-i ıelik etetin qus fabrıkasy iske qosylsa, 250 adam turaqty jumyspen qamtylmaq. Aýdannyń áleýmettik-ekonomıkalyq damýyna tyń serpin beretin ınvestısıalyq jobanyń jalpy quny – 5,5 mlrd teńge.
Qomaqty qarjynyń kóldeneń kók attyǵa jem bolmaı, tıimdi jumsalýyn sybaılas jemqorlyqqa qarsy is-qımyl departamenti qamtamasyz etetin bolady. Jemqorlyqqa qarsy qyzmet pen Poultry-Agro seriktestigi Protecting Business and Investments jobasy aıasynda ózara yntymaqtastyq ornatyp, osyndaı uıǵarymǵa kelip otyr. Eki jaqty kelisim shartyna qol qoıý rásimi «Qostanaı – adaldyq alańy» jobalyq ofısinde ótti.
«Ózara áriptestik sheńberinde biz bıznes ókilderine túrli búrokratıalyq kedergilerdiń, memlekettik organdar tarapynan jasalýy múmkin jónsiz tekserister men tosyn tosqaýyldardyń bolmaýyn qadaǵalaımyz. Al kásipkerge jemqorlyq táýekelderiniń paıda bolýyna sebep bolatyn jaǵdaılardy týyndatpaı, zań sheńberinde ǵana jumys istep, óz bızensin adal júrgizý mindeti júkteledi. Bizdiń basty maqsatymyz – bızneske qolaıly jaǵdaı jasaý jáne qandaı da bir sybaılas jemqorlyq táýekelderine jol bermeý», dedi sybaılas jemqorlyqqa qarsy is-qımyl departamentiniń basshysy Qýanysh Bekbasov.
Búginde Qostanaı oblysynda Protecting Businessand Investments jobasy aıasynda jalpy somasy 180 mlrd teńge bolatyn ınvestısıalyq jobany júzege asyryp jatqan 44 kásiporyn qorǵaýǵa alynǵan.
Alaıda keńse mamandarynyń aıtýynsha, sońǵy ýaqytta ózderimen kelisim-shartqa otyrýǵa nıet bildirgen kásipkerler qatary kóbeıe túsken. Sondyqtan aldaǵy ýaqytta ınvestorlar quqyǵyn qorǵaý boıynsha júrgiziletin jumys aýqymy eki ese ulǵaımaq. Bıyldyń ózinde 100-den astam kásipkerdiń quqyǵyn qorǵap qaldyq.
«Munyń syrtynda, túrli quqyqtyq keńester men tájirıbelik kómek kórsetildi. Bıznes salasynda týyndaǵan máselelerdiń oń sheshim tabýyna Kazakh Invest AQ, kásipkerlik jáne ındýstrıalyq ınovasıalyq damý basqarmasy, sondaı-aq «Atameken» UKP syndy turaqty seriktesterimizdik kóp kómegi tıip otyr», dedi «Protecting Business and Investments jobalyq keńsesiniń jetekshisi Iýlıa Iaroshenko.
