Bıyl Qostanaı oblysynda «Bıznestiń jol kartasy» baǵdarlamasy boıynsha 27,4 mlrd teńgege nesıe berildi. Bul týraly ákimdikte ótken aparat jıynynda Kásipkerlik jáne ındýstrıalyq-ınnovasıalyq damý basqarmasynyń basshysy Oljas Saparbekov aıtty.

Bıyl óńirdegi shaǵyn jáne orta bıznestiń damýyna koronavırýs pandemıasy aıtarlyqtaı áser etti. Soǵan qaramastan «Bıznestiń jol kartasy-2025» baǵdarlamasyn iske asyrý arqyly kásipkerlerdiń tabysy saqtalyp, jańa jumys oryndary ashyldy. Jalpy, «Bıznestiń jol kartasyn» iske asyrýǵa bıyl 5,8 mlrd teńge bólindi. Al baǵdarlama bastalǵaly 2 myńnan astam joba qoldaý tapqan.

• «Kredıtterdi sýbsıdıalaýǵa maquldanǵan jobalar sany 54,9% ulǵaıdy. Bul, aımaqtyń áleýmettik-ekonomıkalyq damýyna tikeleı áser etedi. Memlekettik baǵdarlama qatysýshylary úshin 4924 jańa jumys orny qurylyp, 26589 jumys orny saqtaldy. 77,2 mlrd teńge salyq aýdarymdary tólendi. Úkimet Aýyl sharýashylyǵy ónimin qaıta óńdeý kásiporyndarynyń aınalym qarajatyn tolyqtyrýyna múmkindik jasap otyr. Endi kásip ıeleri ekinshi deńgeıdegi bankter beretin kredıtter boıynsha syıaqy stavkasyn sýbsıdıalaı alady. Bul koronavırýs pandemıasyna baılanysty daǵdarysqa qarsy sharalar aıasynda qolǵa alyndy», — dedi Oljas Saparbekov.

Oblys ákimi Arhımed Muhambetov aýdan-qala ákimderi men basqarma basshylaryna «Bıznestiń jol kartasy» baǵdarlamasynyń sapaly oryndalýyn, joǵary ındıkatorlardy tómendetpeýdi tapsyrdy.