Qostanaı oblysynyń ákimi Arhımed Muhambetov Qostanaı qalasyn abattandyrý, jol jóndeý, nysandardaǵy qurylys jumystarynyń barysyn tekserdi. Aımaq basshysy bul týraly «Instagram» jelisindegi jeke paraqshasynda jazdy.
Arhımed Begejanuly áleýmettik jelide oblys ortalyǵynyń shaǵyn aýdandaryndaǵy alańdardy abattandyrý barysyn qarap shyqty.
«Abattandyrý jospary aıasynda 125,5 mln teńge somasyna balalarǵa arnalǵan kóp fýnksıonaldy alań, kóshe trenajerlaryn, shaǵyn sáýlet nysandaryn ornatý boıynsha jumystar júrgiziletin bolady. Sonymen qatar, osy jyly oblys ortalyǵynda 562,3 mln teńgege 21 fýtbol alańyn, 17 balalar manejin, 56 sporttyq balalar alańyn salý josparlanýda», — dep jazady óńir basshysy Arhımed Begejanuly.
Aımaq basshysy bólisken derek boıynsha, jumysy qyzý júrip jatqan osynshama nysandar bıyldan qalmaı tapsyrylady. Sondaı-aq, aımaq basshysy Áýejaı shaǵyn aýdanyndaǵy jalpy aýdany 8,7 gektar bolatyn Tarelochka kóliniń jańa jaǵalaýyn abattandyrý barysymen tanysty. Búgingi tańda jaǵalaýdaǵy saıabaqtyń kireberisi, gabıondar jáne jaıaý júrginshiler trotýarlary tóselip, árleý jumystary júrgizilgen. İssapar barysynda oblys basshysy Arhımed Muhambetov Qostanaı qalasynyń ákimi Qaırat Ahmetovke josparlanǵan jumystardy ýaqytyly jáne sapaly oryndaýdy tapsyrdy.
Munymen qosa, aımaq basshysy oblys ortalyǵynda jóndeýden ótip jatqan birqatar nysanǵa da baqylaý júrgizdi. Atap aıtqanda, uzyndyǵy 1,9 shaqyrym bolatyn Altynsarın, qashyqtyǵy 1,288 shaqyrymdyq Chkalov jáne 1,245 km Arystanbekov kóshelerindegi avtomobıl joldaryn qalpyna keltirý barysyn tekserdi. Atalǵan kóshelerde ınjenerlik jelilerdi jóńdeý, abattandyrý jáne jol tósemin jóńdeý jumystary jospardaǵysha júrgizilýde.
Sonymen qatar, Arhımed Begejanuly jóndeýden ótken «Maral Ishan» meshitiniń jańa kelbetimen tanysyp shyqty. Quthanadaǵy qurylys jumystary tolyǵymen aıaqtalǵan. Búgingi tańda meshittiń ákimshilik ǵımaratyn qaıta jańǵyrtý jáne aýmaqty abattandyrý jumystary júrip jatyr.
Oblys ákimi at shaldyrǵan taǵy bir eleýli nysan – bas káriz sorǵy stansıasy. Stansıany qalpyna keltirý jumystaryna 685,788 myń teńge bólingen. Bul somaǵa torlar ǵımaraty men baqylaý-ótkizý beketiniń qurylysy jáne sorǵy stansıasy men kanaldardyń rezervýaryn jańǵyrtý iske asady.
Sondaı-aq, № 2 kárizdik sorǵy stansıasyn rekonstrýksıalaý barysy barlandy. Bul maqsatqa 244 883,9 myń teńge bólingen. Oblys ákimi jumys sapary qorytyndysynda atalmysh nysandardaǵy jumystardy belgilengen merzimnen keshiktirmeı aıaqtaýdy tapsyrdy.
Sondaı-aq, Qostanaıda jańa ınfeksıalyq aýrýhananyń qurylysy aıaqtaldy. Ol 10 qazanda jumysyn bastaıdy. Koronavırýs juqtyrǵan naýqastar jatatyn bul aýrýhananyń zamanaýı emdeý qurylǵylarymen qamtylǵan zerthanasy, dıagnostıka ortalyǵy, hırýrgıa bólimi bar.
Infeksıalyq ortalyqtyń basty ereksheligi – mundaǵy naýqastarǵa arnaıy qondyrylǵan planshetter arqyly qashyqtan baqylaý jasalady.
«Bul COVID-19-ǵa qarsy kúres sharalary aıasynda salynǵan kópsalaly ınfeksıalyq aýrýhana. Mundaǵy árbir tósekte ottegige qosylý múmkindigi qarastyrylǵan. Sondaı-aq biz munda BMS júıesin engizdik. Dárigerler endi naýqastyń jaı-kúıin planshet arqyly qashyqtan-aq tekserip, qorytyndy shyǵara alady. Infeksıalyq ortalyq 200 naýqasqa shaqtalǵan. 20 oryndyq jan saqtaý bólimi, endoskopıalyq jáne últradybyspen emdeý bólimi taǵy bar», – deıdi joba jetekshisi Aıdan Narymbaev.
Infeksıalyq aýrýhanada bir oryndy jáne eki, úsh oryndy palatalar bar. Oblystyq aýrýhana dárigerler men medbıkelerdi daıyndap jatyr. Injenerlik quram jasaqtalýda. Jańa aýrýhanany taza jáne las aımaqqa bólip turatyn 8 modýl qarastyrylǵan.
Ortalyq ǵımarattarynyń qos qaptalynda bir-birine qarama-qarsy ornalasqan eki esik bar. Koronavırýs juqtyryp, aýrýhanaǵa jetkizilgen naýqastar birinshi esikten kiredi. Al dertinen aıyqqan adamdar ǵımarattyń ekinshi jaǵyndaǵy basqa esikten shyǵady. Bir qabatty aýrýhana ǵımaratynyń jalpy aýdany 6800 sharshy metr bolady.
Aıdan Narymbaevtyń aıtýynsha, munda aýany tazartyp otyratyn keri jeldetkish ornatylǵan. Aýrýhanadaǵy barlyq aýa arnaıy zararsyzdandyrý qurylǵysy arqyly súzgiden ótedi.
