Qostanaı oblysynda bıyl Áýlıekól, Altynsarın, Fedorov aýdandaryna qarasty birqatar eldi mekenderge gaz qubyry tartylyp, turǵyndar alty aı qys kómir tasyp, pesh jaǵyp, kúl shyǵarý sıaqty kúıbiń turmystyń kúndelikti beınetinen aryldy. Kógildir otyn jyl sońyna deıin taǵy birneshe aýylǵa jetetin bolady.
Jergilikti telearnanyń tikeleı efıri arqyly oblys turǵyndarymen baılanysqa shyǵyp, kók jájikke kóz tikken kópshilikke gaz qubyry tartylatyn aýyldar qatary jyl sanap eselene beretinin jetkizgen «Nur Otan» partıasy Qostanaı oblystyq fılıaly tóraǵasynyń birinshi orynbasary Eldar Kúzenbaev aımaqtyń áleýmettik ınfraqurylymyn damytý maqsatynda júzege asyrylyp jatqan basqa da ıgi sharalar jóninde aıtty.
Ásirese, oblys halqynyń ómir sapasyn jan-jaqty jaqsartý, turǵyndardy taza aýyz sý, baspana jáne sapaly jolmen qamtamasyz etý, áleýmettik ınfraqurylymdy jańartý máseleleri ózekti bolyp qala beredi.
«Jahandyq koronavırýstyq pandemıa oblysymyzdyń ekonomıkalyq jaǵdaıyna keri áser etip jatqany jasyryn emes. Alaıda memleket tarapynan azamattardy qoldaýǵa arnalǵan daǵdarysqa qarsy sharalar ázirlenip, kún saıyn jol-kólik ınfraqurylymyn, turǵyn úı-kommýnaldyq sharýashylyǵyn jańǵyrtýǵa, sondaı-aq salaýatty ekologıalyq jaǵdaıdy saqtaýǵa baǵyttalǵan memlekettik baǵdarlamalar sátti júzege asyrylyp jatyr», — dedi Eldar Kúzenbaev.
Oblystyq fılıal tóraǵasy orynbasarynyń aıtýynsha, búginde kólik ınfraqurylymyn odan ári damytý maqsatynda avtomobıl joldarynyń sapasyn arttyrý jáne 2025 jylǵa qaraı sapaly joldardyń úlesin 95 paıyzǵa jetkizý kózdelip otyr. Onymen qosa, 300-den artyq adam turatyn aýyldarda ortalyqtandyrylǵan sý qubyry tartylady. 200-den 300-ge deıin, nemese odan da kóp turǵyny bar eldi mekenderge kelisimimen sý tazartý jáne sý taratý pýnktteri salynady. Sondaı-aq, halyq sany 200 adamǵa deıingi sýy sapaly qudyǵy joq shaǵyn aýyldarǵa ortalyqtandyrylǵan sý qubyry tartylǵansha aýyz sý syrttan tasymaldanady.
Búginde jergilikti atqarýshy bıliktiń kúshimen oblystyń 11 eldi mekeninde sýmen jabdyqtaý jelilerin qaıta qurý, 93 aýylda sýmen jabdyqtaý nysandaryn salý josparlanýda. Nátıjesinde, aýylda turatyn 98,3 myń turǵynnyń sapaly aýyz sýǵa qol jetkizýine múmkindik týady.
Tikeleı efırde fılıal tóraǵasynyń orynbasary memlekettik turǵyn úı baǵdarlamalaryn iske asyrý barysyna da toqtalyp ótti. Aıtýynsha, byltyr «Nurly jer», «7-20-25» baǵdarlamalary sheńberinde 1580 otbasy baspanaly bolǵan.
— Azamattardyń áleýmettik ál-aýqaty — aımaqtyń turaqty áleýmettik-ekonomıkalyq damýynyń kórsetkishi bolyp tabylady. Biz bilim berý, densaýlyq saqtaý, sport jáne áleýmettik qyzmetter salasyndaǵy sapaly qyzmetterge qol jetimdilikti qamtamasyz etý arqyly aımaq turǵyndarynyń turmystyq jaǵdaıyn jaqsartamyz. Jergilikti bılik Qostanaı oblysy turǵyndarynyń talap-tilekterin qanaǵattandyrý maqsatynda, qoldan kelgeninshe, múmkin sharalardyń barlyǵyn tıimdi júzege asyryp keledi» — dedi Eldar Kúzenbaev.
«Nur Otan» partıasynyń aımaqtyq fılıaly jergilikti telearna men áleýmettik jelidegi tikeleı efırler arqyly oblys turǵyndarymen turaqty tildesip, pikir almasyp, oı bólisip otyratynyn aıta ketken jón. Mundaı sharalarda turǵyndar ózderin tolǵandyrǵan máseleler boıynsha saýal qoıyp, birden jaýap alýǵa múmkindik alady. Bul jolǵy tikeleı efır partıanyń áleýmettik jelilerdegi resmı paraqshalarynda aldyn ala habarlandyryldy.
