Qostanaı oblysynyń Amangeldi aýdanynda halyqtyń áleýmettik osal toptaryna páter berildi. Memleket basshysy Qasym-Jomart Toqaev «Jańa jaǵdaıdaǵy Qazaqstan: is qımyl kezeńi» atty Joldaýynda aýyl eńbekkerlerin baspanamen qamtamasyz etýdi óńir ákimderine júktegen bolatyn. Turǵyndardy baspanamen qamtý Qostanaı oblysynda da keshendi túrde sheshilip keledi.
Máselen, Amangeldi aýdanynda 1997 jyldan beri jaramsyz kúıde turǵan nysan kúni keshe paıdalanýǵa berildi. Baspananyń halyq ıgiligine berilýi QR Tuńǵysh Prezıdenti kúnimen tuspa-tus keldi. Atalmysh úı oblys ákimi Arhımed Muhambetovtiń tapsyrmasymen «Jumyspen qamtý jol kartasy» baǵdarlamasy aıasynda qolǵa alyndy. Joba quny – 169 mln teńge. Qaıta jańǵyrtýdan ótken úıdiń aýmaǵy 1268 sharshy metrdi quraıdy. Munda 2 jáne 3 bólmeli 18 páter bar. Qurylysty «Alúmınstroı» jaýapkershiligi seriktestiktigi 152 mln teńgege júrgizip, sapaly oryndap shyqqan.
Amangeldi aýdanynyń ákimi Ámirhan Asanovtyń aıtýynsha, páterler kezekte turǵan kóp balaly otbasylarǵa, ata-ananyń qamqorlyǵynsyz qalǵan balalarǵa, halyqtyń áleýmettik osal tobyna jatatyn turǵyndarǵa jáne búdjet qyzmetkerlerine berildi.
«Qazirgi tańda Amangeldi aýdanynda turǵyn úı kezeginde 131 adam tur. Onyń ishinde jetim jáne ata-anasynyń qamqorlyǵynsyz qalǵan balalar sany – 27, kóp balaly analar – 25, halyqtyń áleýmettik jaǵynan osal top músheleri – 33, memlekettik jáne búdjettik uıymdardyń qyzmetkerleri – 46 adam. Bıyl halyqpen esepti kezdesýde oblys ákimi Arhımed Begejanuly turǵyn úı salý týraly tapsyrma bergen bolatyn. Osy tapsyrmany oryndaý maqsatynda maýsym aıynda aýdan ortalyǵynan 11 páterli jataqhana salyp, áleýmettik osal sanatqa jatatyn otbasy múshelerine tapsyrdyq. Aıtýly merekede qýanyshtary eselenip jatqan otbasy múshelerin shyn júrekten quttyqtaımyn», — dedi aýdan basshysy.
Baspanaly bolǵandardyń biri – kópbalaly ana Baný Muhatova. Ol buǵan deıin páter jaldap kelgen. Oblys ákiminiń turǵyndarmen kezdesýinde jaǵdaıyn aıtyp, baspana bólýin suraǵan. Mine, jalǵyzbasty ananyń armany oryndaldy!
«Osy kúnge deıin ózimizdiń úıimiz bolmaı, jaldamaly páterde turyp, ártúrli qıyndyqtardy kórip keldik. Dál qazirgi sezimimdi sózben aıtyp jetkize almaımyn. Osy qamqorlyqtary Elbasymyz Nursultan Ábishulyna, Prezıdentimiz Qasym-Jomart Kemelulyna jáne de oblystyń, aýdannyń basshylyǵyna alǵysymyz sheksiz», — dep atap ótti Baný Muhatova.
