Qostanaı oblysy ákimi Arhımed Muhambetovtiń qatysýymen ótken keńeıtilgen aparat jıynynda volonter jylynyń nátıjeleri baıandaldy, dep habarlaıdy Qostanaı oblysy ákiminiń baspaóz qyzmeti.

Bıyl Qostanaı oblysynda jastary qalalardy aıtpaǵanda, shalǵaı aýyldarda volonterler qozǵalysyn quryp, kóptegen ıgi bastamalarǵa muryndyq boldy. Qazirgi ýaqytta oblysta 90 volonterlik uıymnyń qyzmeti tirkelgen. Olardyń jumysyn oblys ákimdiginiń jastar saıasaty máseleleri basqarmasy qadaǵalap, baǵyt-baǵdar berip otyrdy.

«Búgingi tańda Qostanaı oblysy volonterliktiń Taza Álem baǵytyn tańdaǵan. Munda qorshaǵan ortany qorǵaý, ózender men ormandardy tazartý, aǵash otyrǵyzý, qaıtalama shıkizattan shyǵarmashylyq ónimder jasaý arqyly halyq ekologıasyn úıretýge basymdyq berilgen. Jalpy volonterlik qozǵalysty qoldaýǵa memlekettik áleýmettik tapsyrys aıasynda 19 jobany júzege asyrýǵa 18,3 mln teńge qarastyrylǵan. Jyl basynan beri 800-den astam is-shara ótkizilip, oǵan 6000 volonter qatysty», — dedi Arhımed Muhambetov.

Rasymen de erikti jastardyń oblys turǵyndaryna tıgizgen kómekteri kóp boldy. Jastar kómegi elimizde tótenshe jaǵdaı engizilip, karantın rejımi bastalǵan shaqta sezildi. Nátıjesinde Qostanaı oblysynyń ár aýdanynda volonterler jastaqtary quryldy. Olar shekteý sharalaryn saqtaýdyń mańyzdylyǵyn túsindirý jumystaryna da belsendi atsalysyp keledi.

Volonterler polısıa qyzmetkerlerimen birlesip, karantın sharalaryn saqtaý týraly paraqshalardy, medısınalyq maskalar men azyq-túlikterdi taratty. Volonter jasaqtary aýdandyq aýrýhanamen de tyǵyz baılanysta bolyp, tótenshe jaǵdaı kezeńinde zeınetkerlerge jáne aýrýhanada esepte turǵan jalǵyzbasty adamdarǵa dári-dármek tasymaldaýdy uıymdastyrdy. Keńes qorytyndysy boıynsha oblys ákimi volonterlik qozǵalysqa qoldaý kórsetý jáne jastardy volonterlik qyzmetke tartý boıynsha jumysty jalǵastyrýdy tapsyrdy.