Qostanaı oblysynyń Óńirlik komýnıkasıalar qyzmetinde Lısakov qalasynyń ákimi Almat Ismaǵulov jýrnalıstermen brıfıń ótkizdi.

Lısakov qalasynda 2020 jyldyń 11 aıynda 50 mlrd teńgeniń ónimi óndirilgen. Atap aıtqanda, sút óndirisi — 32%, metal qurylǵylarynyń óndirisi — 31% artty. Mashına jasaý sektorynda da ósim bar. 542 destelegish qurastylyp, egis keshenderiniń óndirisi 4 ese ulǵaıdy.

«Negizgi kapıtalǵa salynǵan ınvestısıalar kólemi 21 mlrd teńgeni qurady. «Bobrovskı Kvarsıt» jeke sharýa qojalyǵy 8 mlrd teńgege kremnı karbıdin óndiretin zaýyttyń qurylysyn bastady. Aldyn ala boljam boıynsha zaýyt jylyna 34 myń tonna kremnı karbıdin óndiredi. Nátıjesinde qalanyń 175 turǵyny turaqty jumysqa ornalasady. Budan bólek, qaladaǵy shaǵyn aýdandardyń birinde quny 430 mln teńgeni quraıtyn sporttyq-oıyn-saýyq parkiniń qurylysy júrgizilýde. Koronavırýs pandemıasyna baılanysty saıabaqtyń paıdalanýǵa berý merzimi 2021 jylǵa aýystyryldy», — dedi Almat Ismaǵulov.

Lısakov qalasynyń turǵyn úı qurylysy salasynda da ilgerileý bar. Osy jyly óńirde 9254 sharshy metr turǵyn úı paıdalanýǵa berildi, bul 2019 jyldyń sáıkes kezeńinen 3,3% artyq. Jeke ınvestısıa esebinen jergilikti ınvestor 16 páterli jalǵa beriletin turǵyn úı salyp jatyr. Qalada «Bıznestiń jol kartasy 2025» memlekettik baǵdarlamasy sheńberinde 105,7 mln teńgege 10 joba maquldanǵan.

Al «Qarapaıym zattar ekonomıkasy» salalaryn jeńildikpen kredıtteý baǵdarlamasyna 103 mln teńge bólindi. Lısakov turǵyndary ortalyqtandyrylǵan aýyz sý júıesine tolyqtaı qosylmaq. Qazir 11,5 shaqyrym bolatyn magıstraldyq sý qubyrlaryn qaıta jańartý boıynsha eki jyldyq jobalar bastaldy. Aýqymdy jumystarǵa 560 mln teńgeden astam qarjy baǵyttaldy. Sońǵy kezderi qala turǵyndary medısınalyq nysandardyń jumysyna syn aıtyp, qala ákiminiń blogyna hattar jazǵan bolatyn. Qazir ortalyq aýrýhananyń materıaldyq-tehnıkalyq bazasyn jaqsartý boıynsha keshendi sharalar qolǵa alyndy.

Qalalyq aýrýhanaǵa 4 sanıtarlyq avtokólik jáne demeýshilik kómek boıynsha 1 reanımobıl, medısınalyq jabdyq, 4 jańa Hyundai markaly avtokólik satyp alyndy. Lısakovta dári-dármek pen jeke qorǵanys quraldarynyń 3 aılyq qory bar.