«Qostanaı oblysy jastarynyń Altyn kitaby» — óńirdiń daryndy jastaryna qoldaý kórsetip, yntalandyrýdy kózdeıtin biregeı joba. Atalmysh jobanyń alǵashqy laýreattary osydan 5 jyl buryn marapattalǵan. Sodan beri jyl saıyn 14 pen 29 jas aralyǵyndaǵy daryndy ári belsendi jastardyń esimi «Altyn kitapqa» jazylyp keledi. Búginge deıin kitapqa 229 esim enipti.
Bıylǵy irikteýge óńirde ár salada eńbek etip júrgen eki júzden astam jas qatysty. Úmitkerler esimi áýeli áleýmettik jelide tanystyryldy. Olarǵa kópshilik Qostanaı oblysynyń jastar saıasaty máseleleri jónindegi basqarmasynyń ınstagram paraqshasy arqyly daýys berdi. Bul irikteýdiń birinshi kezeńi. Odan tańdalǵan eń myqtylardy baıqaý komısıasy talqyǵa saldy. Sóıtip, 11 nomınasıada úzdikter anyqtaldy.
Sonymen, «Jas saıasatker» atalymynda Alına Ishanova, «Jýrnalıstıka» nomınasıasynda Qasqyrbaı Qoıshymanov, «Mádenıet jáne óner salasyna qosqan úlesi úshin» – Janna Talaspaeva, «Bilim jáne ǵylym salasyna qosqan úlesi úshin» – Rústem Beıishov, «Memlekettik qyzmetti damytýǵa qosqan úlesi úshin» – Ryskúl Taskýmbaeva, «Sporttaǵy jetistikteri úshin» – Nadejda Rábes, «Densaýlyq saqtaý salasyn damytýǵa qosqan úlesi úshin» – Karına Iýsýpova, «Jastar kásipkerligin damytýǵa jáne Start-up jobalarǵa qosqan úlesi úshin – Lázzat Ahmadıeva, «Volonterlyqty damytýǵa qosqan úlesi úshin» – Damır Ótebaev, «Aýyldyń damýyna qosqan úlesi úshin» – Naýryzbek Birmaǵambetov «Altyn kitap» laýreaty atandy. Al qyzmettik boryshyn atqarý barysynda qylmyskerdiń qolynan qaza tapqan polısıa qyzmetkeri Darhan Bazarbaevtyń esimi «Jas batyr» nomınasıasy boıynsha «Altyn kitapqa» jazyldy.
– Men baq synaǵan «Jýrnalıstıka» atalymynda on shaqty úmitker baq synady. Eńbegimdi baǵalap, qazylar jeńisti maǵan berýdi uıǵarypty. «Altyn kitapqa» esimi engen barsha zamandastarymdy quttyqtaımyn, — deıdi jýrnalıs Qasqyrbaı Qoıshymanov.
Juldyzy janǵan jas jýrnalıstiń jetistigi bul ǵana emes. Ol 2017 jylǵy «Úzdik maqala» oblystyq baıqaýynyń jeńimpazy. 2018 jyly QR Memlekettik qyzmet isteri agenttigi uıymdastyrǵan «Úzdik baspa jarıalanymy» nomınasıasynda top jardy. Al byltyr «Egemen Qazaqstan» gazeti ótkizgen óńirdegi jýrnalıster baıqaýynda birinshi oryn ıelendi. 2019 jyly «ERG» kompanıasy uıymdastyrǵan jýrnalıster baıqaýynyń júldegeri.
