Pandemıa kezeńinde indetke qarsy kúrestiń alǵy shebinde júrgen qostanaılyq dárigerler men polıseılerdiń, qolǵanat-qamqorshyǵa aınalǵan eriktiler men mesenattardyń, halyqty aqparatpen qamsyzdandyrǵan jýrnalısterdiń eńbekteri elendi. Olar QR Prezıdentiniń tapsyrmasymen taǵaıyndalǵan «Halyq alǵysy» medalimen marapattaldy.
El basyna tóngen qaterdi seıiltýge dárigerler men tártip saqshylarynyń ǵana emes, elgezek eriktilerdiń sińirgen eńbekteri eren. Máselen, olar qıyn kezeńde turmysy tómen otbasylardyń muqtajyn túgendep, qarttardyń qamyn jedi. Emhanalarǵa tapshy preparattar men ottegi balondaryn tasydy. Halyqqa qyzmet kórsetý ortalyqtary men bankterdiń qyzmetine demeý berip, adamdardyń shoǵyrlanbaýyn qadaǵalady. Blok-beketterdegi dárigerler men polıseılerge tamaq tasyǵan da osy volonterler.
«Pandemıa bastalǵaly oblystaǵy barlyq Úkimettik emes uıym, árqaısysynyń ártúrli mısıalary bola túra, ortaq múdde aıasynda bas biriktirdi. Eriktilerdi jumyldyryp, halyqtyń áleýmettik osal tobyna jatatyn azamattarǵa, zeınetkerlerge úzdiksiz kómek kórsetti, jumystar áli de jalǵasýda, — dep baıandady Jastar resýrstyq ortalyǵynyń jetekshisi Dınara Ótebaeva.
Onyń málimetinshe, eriktiler jasaǵy kótemnen kúzge deıin Qostanaıdaǵy 5 emhanaǵa qajetti dári-dármek aparýǵa kómektesken, sondaı-aq lokdaýn kezderinde avtovolonterler jumysqa shyǵypty. Jaz aılarynda jalpy somasy 4 mln teńgeniń ottegi konsentrattaryn tıep-túsirýdi de volonterler mindetine alypty.
«Bul – búkil álemniń ıyǵyna túsken aýyrpalyq. Qanshama adamnyń osy kesel kesirinen kóz jumǵanyn oılaýdyń ózi qabyrǵaǵa batady. Degenmen, sizderdeı jomart júrekti jandardyń demeýinsiz jaǵdaı áldeqaıda kúrdeli bolar ma edi? Sizder, eriktiler, qaljyraǵan halyqqa qanshama kómek berdińizder. Kim biledi, kóptegen ómirdi qutqaryp qalǵan bolarsyzdar. Bul – umytylmas ýaqyt, sizderdiń de eren eńbekterińiz tarıhqa enedi, keıingi urpaqqa úlgi bolady. Sondyqtan búgingi laıyqty marapattaryńyzben quttyqtaımyn», — dedi oblys ákiminiń orynbasary Baqyt Esimova.
Sonymen, Memleket basshysynyń jarlyǵymen taǵaıyndalǵan «Halyq alǵysy» medalin Qostanaı oblysynan 127 adam ıelenip otyr. Jikteı aıtqanda, 40 dáriger, 25 polıseı, áleýmettik salanyń 21 qyzmetkeri, 9 ÚEU basshysy, 7 mesenat, 2 jýrnalıs, 2 memlekettik qyzmetshi jáne 1 mádenıet qyzmetkeri tósbelgi taqty. Przeıdenttiń qoly qoıylǵan marapatqa laıyq dep tanylǵan belsendilerdiń biri – «Jas Atameken» uıymynyń jetekshisi Zarına Kókjanova bul marapatty komandalyq jumystyń jemisi dep biledi.
«Osy jemisimizben «Jas Atameken» ujymyn quttyqtap, alǵys aıtqym keledi. Óıtkeni jaz boıy atqarylǵan orasan zor eńbek maǵan ǵana tıesili emes. Men, bar bolǵany, eriktilerdi birlikti iske bilek sybana kirisýge shaqyrdym. Buǵan túrtki bolǵan jaǵdaı ákemniń osy indetpen naýqastanyp qalýy edi. Qanshama jannyń osyndaı qıyndyqqa tap bolǵanyn oılap, júregim aýyrdy. Sondyqtan qur qarap jata almadym. Bul bedeldi marapat bizge odan saıyn serpin bere túseri sózsiz», — deıdi Zarına.
Aıta keteıik, «Halyq alǵysy» medali 2020 jyly 8 maýsymda QR Prezıdenti Q.Toqaevtyń jarlyǵymen bekitilgen edi.
