Qostanaılyq polıseıler qaza bolǵan áriptesteriniń otbasylaryna baryp, Táýelsizdik kúnimen quttyqtady, dep habarlaıdy oblystyq Polısıa departamenti baspasóz qyzmeti.

Polısıa qyzmetkeri Fedor Balanovskı 1992 jyly qyzmettik mindetin atqarý kezinde qaza tapqan-dy. Mılısıa starshınasy Fedor Balanovskııge qaskóıler oq atqan. Ol İshki ister organdarynda 14 jyl qyzmet etken. Áriptesteriniń aıtýynsha, Fedor tájirıbesi mol maman bolǵan.

«1992 jylǵy 7 tamyzda mılısıa starshınasyn kúdikti er adam tabeldik qarýmen atyp, jaraqattaıdy. Qaza tapqan tártip saqshysynyń esimi Qostanaı oblysy Polısıa departamentiniń «Mılısıa dańqy» memorıaly men murajaıynda saqtalǵan», delingen polısıa aqparatynda.
Serjant Qaıyrjan Jappasbaevtyń esimi de máńgi este qalady. Jol polısıasy ınspektory 2009 jyly 1 tamyzda mas júrgizýshiniń kinásinen bolǵan jol apaty saldarynan qaza tapty. «Sol kezde polıseı jol qozǵalysynyń saqtalýyn qadaǵalaýdy júzege asyryp turǵan bolatyn. Medısınalyq pýnktke barar jolda tártip saqshysy aýyr dene jaraqattarynan kóz jumdy. Polıseıdiń artynda jubaıy Gúljan men uly Dáýlet qaldy. Kadr saıasaty basqarmasy bastyǵynyń orynbasary Qýanysh Dúısebaev Tatána Balanovskaıa men Gúljan Jappasbaevaǵa gúl shoqtaryn tapsyryp, tártip saqshylary atynan materıaldyq kómek kórsetti. Áıelder polıseılerge jubaılaryn eske alǵany jáne kóp kóńil bólgeni úshin alǵys aıtty», — deıdi polısıanyń baspasóz qyzmetindegiler.

Tártip saqshylary ár jyldary qyzmet babynda qaza tapqan 17 áriptesiniń otbasyna bardy. Aıta ketý kerek, qostanaılyq polıseıler qaza tapqan polıseılerdiń otbasyna turaqty túrde qoldaý kórsetýde.