Jitiqara qalasy men Denısov , Fedorov aýdandarynyń turǵyndaryna jańa páterdiń kilti tapsyryldy. Qostanaı oblysynyń ákimi Arhımed Muhambetov Jitiqara qalasynyń 80 januıasyna páter kiltin tapsyrdy. Bes qabatty 80 páterli úı osy jyly «Jumyspen qamtýdyń jol kartasy» memlekettik baǵdarlamasy aıasynda salyndy.

Úı qurylysy kezinde 121 adam jumysqa ornalasty, onyń ishinde 68 adam halyqty jumyspen qamtý ortalyǵy arqyly joldama alǵan.

«Búgin biz úshin óte mańyzdy, kópten kútken kún, ol ómir boıy este qalady. Onyń ústine, biz óz úıimizdiń kiltin Táýelsizdik kúnin merekeleý kezinde aldyq. Bul — bizge memleketten tamasha syılyq», — deıdi páter alǵan kópbalaly ana Aısulý Aqtaeva.

Oblys basshysy Aısulý Aqtaevaǵa 3 bólmeli páterdiń kiltin berdi. Buǵan deıin olar jaldamaly páterde turǵan. Sondaı-aq, búgin Fedorov aýdany Fedorov aýyly men Denısov aýdany Denısov aýylynyń turǵyndary da qonys toıyn toılady. Bıyl Fedorov aýylynda 4 jáne 24 páterli turǵyn úıler salyndy. Mereke kúni kezekte turǵan kóp balaly otbasylar men áleýmettik jaǵynan az qamtylǵandarǵa baspana berildi.

Denısov aýylyndaǵy 20 páterli úıge de kópbalaly otbasylar men jetim balalar qonystandy. Sonymen qatar dárigerlerge, áleýmettik sala qyzmetkerlerine jáne kezekte turǵandarǵa páter kilti tapsyryldy. Búginde Qostanaı oblysynda memlekettik baǵdarlamalar aıasynda 328,3 myń sharshy metr turǵyn úı paıdalanýǵa berildi. Jyl sońyna deıin taǵy 51 myń sharshy metr úı naryqqa shyǵady. Jospar boıynsha 850 az qamtylǵan otbasy men muqtaj jandar turǵyn úı jaǵdaıyn jaqsartpaq.