Qostanaı oblysynyń ákimi Arhımed Muhambetov Táýelsizdik kúnine oraı «Jastar saraıynda» ótken saltanatty jıynda óńirdiń damýyna eleýli úles qosqan azamattarǵa memlekettik nagradalar tabys etti.

«Búgin osy zalda óńirdiń damýyna kúndelikti eńbegimen úles qosyp kele jatqan túrli sala ókilderi jınaldy. Memleket basshysy Qasym-Jomart Kemeluly Toqaevtyń Jarlyǵymen 48 qostanaılyq memlekettik nagradalarǵa ıe boldy. Bul – qajyrly eńbektiń nátıjesi jáne Otanymyzdyń ıgiligi jolyndaǵy sizderdiń qyzmetterińizge berilgen joǵary baǵa. Áleýmettik-ekonomıkalyq reformalardy júzege asyrýǵa qosqan zor úlesterińiz úshin Sizderge jáne ujymdaryńyzǵa alǵys bildirýge ruqsat etińizder», — dedi Arhımed Muhambetov quttyqtaý sózinde.

Jıyn barysynda «Frýnzenskoe» JShS dırektory Nıkolaı Sherer «Parasat» ordenimen, Jitiqara aýdanynyń ákimi Abaı Ibraev, «Qostanaı mıneraldary» AQ Basqarma tóraǵasy Erbol Nurhojaev, «Ýspenovsk» SHQ basshysy Anatolı Sergeev, «Shaıhın» SHQ basshysy Ǵalymjan Shaıhın «Qurmet» ordenimen marapattaldy.

«Zará» AQ mehanızatory Alekseı Asanov, «Svetlyı Jarkol» JShS mehanızatory Nurlybek Baısalbaev, «Hamıtov» SHQ mehanıkalyq tok mashınısi Sergeı Býller, «Syma» JShS mehanızatory Serikbol Tólemis III-dárejeli «Eńbek Dańqy» ordenin keýdelerine taqty.
Sondaı-aq, birqatar qostanaılyqtar «Eren eńbegi úshin», «Shapaǵat», «Halyq alǵysy» medaldarynyń, Qazaqstan Respýblıkasynyń jáne Qazaqstan Respýblıkasy Prezıdenti Qurmet gramotalarynyń, «Belsendi qyzmeti úshin» tósbelgileriniń ıegeri atanyp otyr.
Marapattalǵandardyń arasynda dárigerler, pedagogtar, qoǵam qaıratkerleri, memlekettik qyzmetshiler jáne bıznes ókilderi bar.

Bul joly óńirimizdiń órkendeý jolynda aıanbaı ter tókken bes qostanaılyq «Qostanaı oblysynyń Qurmetti azamaty» ataǵyna ıe bolyp otyr. Olar: Uly Otan soǵysynyń ardageri, aqyn, jyrshy, jýrnalıs Qasymhan Aldabergenov, «Máskeleý» JShS dırektory Zeınolla Jańbyrshynov, «Jeleznodorojnoe AMF» JShS dırektory Maksım Artemýk, Qazaqstannyń eńbek sińirgen qyzmetkeri Baǵıla Baımaǵambetova jáne aqyn, dramatýrg Aqylbek Shaıahmet.