Qostanaıda dástúrli «Trıýmf» marapattaý rásimi ótti. Saltanatty shara barysynda oblys ákiminiń orynbasary Baqyt Esimova halyqaralyq jáne respýblıkalyq bilim jarystarynda jeńimpaz atanǵan 20 oqýshy men olardyń ustazdaryn marapattady.

Karantınge baılanysty rásimge 5 oqýshy jáne 5 muǵalim qatysty, qalǵan laýreattar óz marapattaryn ózderi turatyn aýdan basshylyǵynyń qolynan alatyn bolady.
Sharada ǵylym, shyǵarmashylyq jáne sport salasynda jetistikke jetken daryndy oqýshylarǵa «Trıýmf» músinsheleri, Qostanaı oblysy ákiminiń alǵys haty men noýtbýkter tabys etildi.

«Bıologıa boıynsha olımpıadalarǵa qatysý maǵan bolashaq mamandyǵymdy anyqtaýǵa kómektesti. Men dáriger mamandyǵyn tańdadym, qoǵamǵa paıdamdy tıgizgim keledi. Qazir Nazarbaev Ýnıversıtetine túsýge daıyndalyp jatyrmyn. Óz mektebimniń qabyrǵasynda alǵan sapaly bilim armanymnyń júzege asýyna mindetti túrde kómektesedi», deıdi «Bilim-ınnovasıa lıseı-ınternatynyń» oqýshysy Arman Kósherbaev.

Saltanatty rásimde jeńimpaz shákirtterdiń ustazdaryna da alǵys hattar men planshetter tabystaldy.

«Trıýmf» marapattaý rásimi oblysta 2009 jyldan beri jyl saıyn Táýelsizdik kúni qarsańynda uıymdastyrylyp keledi. Osy ýaqyt aralyǵynda bir jarym myńnan astam jas ǵalymdar, sportshylar, ártister men sýretshiler «Trıýmf» laýreaty atandy.