Қостанай облысына қарасты Әулиекөл аудандық өрт сөндіру бөлімінің ғимаратында азаматтық қорғаныс ардагері, ішкі қызмет подполковнигі Қайырбек Қабиевке мемориалдық тақта орнатылды.
Ескерткіш тақтаның ашылу рәсіміне жергілікті мемлекеттік органдардың, төтенше жағдай департаментінің және аудандық өртке қарсы күрес қызметінің басшылары, ардагер өрт сөндірушінің туыстары мен ауыл тұрғындары қатысты. Мемориалдық тақтаны аудан әкімі Ерлан Теменов пен Қостанай облысы ТЖД ардагерлер кеңесінің төрағасы Александр Мельников ашты.
Салтанатты шарада аудандық мәслихат хатшысы Дәулет Қойшыбаев құттықтау сөз сөйлеп, жиналған көпшілікке өзгенің өмірі үшін талай мәрте отқа кіріп, батырлықтың үлгісін көрсеткен даңқты өрт сөндірушінің еңбек жолы туралы баяндап берді.
– Қайырбек Қабиев өзіне жүктелген міндетті адал орындаған өжет өрт сөндіруші, білікті маман еді. Оның сындарлы сәтте қызыл жалынның арасынан талай адамды аман алып шыққан көзсіз батырлығын бүгінгі өскелең ұрпаққа өнеге етуіміз керек. Өз ісіне берілген, қысылтаяң кезде әбжіл қимылдайтын шебер өрт сөндірушінің еңбегі еленіп, кезінде жоғары марапаттарға ие болды. Енді, міне, бүгін батырға кейінгі буын әріптестері лайықты құрмет көрсетіп, ескерткіш тақта орнатып жатыр. Бұл күн ерлік ескеріліп, батырлық бағаланған күн ретінде ел есінде сақталады, – деді Дәулет Қойшыбаев.
Еңбек жолын өрт күзетінің инспекторы болып бастаған Қайырбек Қабиев төтенше жағдай қызметі саласында ұзақ жыл қатардағы өрт сөндіруші болып қызмет атқарды. Кейін басшылық қызметке ауысып, Әулиекөл, Құсмұрын ауылдарында және Аманқарағай бекетінде өрт сөндіру бөлімшелерін жасақтады.
