Сенаторлар көшпелі кеңесте қоныс аудару мәселелерін талқылады. «Өңір» депутаттық тобының мүшелері сенаторлар Ерік Сұлтанов пен Әлімжан Құртаев жұмыс күші артық азаматтарды еліміздің еңбек күші тапшы өңірлеріне көшіру мәселелерін қарау бойынша отырысқа дайындық шеңберінде Қостанай облысында кеңес өткізді.
Олар әуелі облыс әкімімен кездесіп, жергілікті атқарушы органдардың өкілдері, мәслихат депутаттары, ауыл шаруашылығы тауарларын өндірушілер және жұртшылық қатысқан кеңесте бірқатар өзекті мәселелер талқылады. Атап айтқанда, сенаторлар қоныс аудару бағдарламасын іске асыру барысында туындайтын проблемаларға ерекше назар аударды.
«Бүгінгі таңда қоныс аударушыларды квоталар санының артуы, ауыл шаруашылығы мұқтаждықтары үшін жер учаскелерін бөлу, кредиттік демалыстар беру сияқты мәселелер ерекше алаңдатады. Сондықтан біз бүгін Орталық мемлекеттік органдар бойынша нақты шешімдер әзірлеу үшін осы тақырыптарды белсенді түрде талқылап жатырмыз», – деп атап өтті ҚР Сенат депутаты Әлімжан Құртаев.
Күн тәртібіндегі тағы бір мәселе Қостанай облысында қандастарды елдің оңтүстігінен солтүстігіне көшіру бойынша «Асар» пилоттық жобасын іске асыру мүмкіндігін талқылау болды.
Бұл жобаны Дүниежүзі қазақтарының қауымдастығы 2018 жылдан бастап осы ұйым төрағасының бірінші орынбасары Зауытбек Тұрысбековтың тікелей қатысуымен іске асырып келеді.
«Асар» жобасын сәтті жүзеге асыру Өзбекстаннан Шымкент қаласына барлық қажетті жағдайларды жасай отырып, 25 мыңнан астам қандастарды көшіруге мүмкіндік бергенін атап өткен жөн.
Енді осы ауқымды жоба Ақмола облысының Аршалы ауданында белсенді іске асырылуда, онда қандастар өз қаражаты есебінен 8 мың адамға арналған 1 282 типтік коттедждің құрылысын жүргізуде.
Осындай бастаманы Қостанай облысында да жүзеге асыруға дайын.
«Бүгін біз еліміздің оңтүстігінен солтүстігіне қоныс аударуға және өз қаражаты есебінен үй салуға кірісуге дайын 1 861 отбасының немесе 6 549 адамның тізімін әкелдік. Бірақ оларға қажетті инженерлік және әлеуметтік инфрақұрылымы бар жер учаскелерін беру түрінде қолдау қажет», – Зауытбек Тұрысбеков өз сөзінде атап өтті.
Бұл ұсынысты облыс әкімі қолдады, ол Қостанай облысында «Асар» жобасын іске асыруға толық дайындығын білдірді.
«Қоныс аудару мәселесі өте өзекті және оның саяси, экономикалық, әлеуметтік және мәдени маңызы зор. Заң шығарушы және атқарушы биліктің белсенді өзара іс-қимылы осы бағыттағы проблемаларды шешу жөнінде нақты тәсілдер әзірлеуге мүмкіндік беретініне сенімдімін», – Ерік Сұлтанов кеңесті қорытындылай келе атап өтті.
2017 жылдан бастап «Еңбек» бағдарламасын іске асыру басталғаннан бері Қостанай облысқа республиканың еңбек күші артық облыстарынан 3 113 қоныс аударушы келді. 2021 жылы өңірлік квотаға 672 қоныс аударушы енгізілді. Барлық қоныс аударған азаматтармен әлеуметтік келісімшарттар жасалды, қоныс аударуға субсидиялар және тұрғын үй жалдауға (жалға алуға) немесе сатып алуға субсидиялар төленеді.
Ағымдағы жылы жұмыспен қамту шараларымен 256 адам қамтылды: 233 адам жұмысқа орналастырылды, 14 адам өз кәсібін ашты, 2 адам «Бастау бизнес» жобасы бойынша кәсіпкерлік негіздеріне оқыту курстарына жіберілді, 7 адам гранттар мен шағын несиелер алды.
Облыс әкімдігінің жұмыспен қамтуды үйлестіру және әлеуметтік бағдарламалар басқармасының сайтында ақпараттық-түсіндіру жұмысы аясында www.zansoc.kostanay.gov. kz квотаға енгізу үшін көрсетілетін мемлекеттік қызметтің тәртібі мен шарттары туралы ақпаратты, сондай-ақ «Еңбек» бағдарламасы шеңберінде ұсынылатын мемлекеттік қолдау шараларын, паспорттарды, қоныстандыру карталарын, облыстың әрбір ауданы мен қаласы бойынша Портфолионы, мемлекеттік және орыс тілдерінде сұранысқа ие мамандықтар тізбесін орналастырды.
Сондай-ақ, «Еңбек» бағдарламасында бірқатар мемлекеттік қолдау шаралары қарастырылған:
— қажет болған жағдайда техникалық және кәсіптік білімі бар оқуға немесе қысқа мерзімді курстарға жіберу;
— тұрақты жұмыс орындарына жұмысқа орналастыру;
— 12 айға дейінгі мерзімге 35% мөлшеріндегі жалақыға жұмыс берушілердің шығыстарын ішінара субсидиялай отырып, әлеуметтік жұмыс орындарына жіберу;
— «Бастау Бизнес» жобасы бойынша кәсіпкерлік негіздеріне тегін оқыту сияқты кәсіпкерлік бастамаларды дамытуды қолдау; жаңа бизнес-идеяларды іске асыруға 200 АЕК-ке дейінгі (583,4 мың теңгеге дейін) сомада мүкәммал, технологиялық жабдық, еңбек құралдары, жануарлар, мал, құс және т.б. сатып алуға гранттар беру; бизнесті ашуға және кеңейтуге жеңілдікті шарттармен жылдық 6% — бен шағын кредит беру.
Жұмыс сапарының екінші күні сенаторлар – «Өңір» депутаттық тобының мүшелері, сондай-ақ Дүниежүзі қазақтары қауымдастығының өкілдері Қостанай қаласындағы «Қонай» және Қостанай ауданы Тобыл қаласының «Северный» шағын аудандарындағы тұрғын үй құрылысымен танысты.
Сонымен қатар, әлеуметтік нысандар, сондай-ақ болашақ қоныс аударушылар үшін әлеуетті жұмыс орны бола алатын кәсіпорындар қаралды. Олардың ішінде – Қостанай индустриалды аймағындағы «Камаз» зауытының құрылысын, «СарыарқаАвтоПром» көлік құрастыру зауыты мен «АгромашХолдингінің» локализациялық орталығын аралады.
«СарыарқаАвтоПром» ЖШС – облыстағы машина жасау саласындағы ірі кәсіпорын болып табылады. Кәсіпорын 2010 жылдың мамыр айында құрылған. Жеңіл және жүк автомобильдерін, автобустарды өндіруді жүзеге асырады.
Кәсіпорын 10 брендтің (SAZ, Yutong, KIA, Lada, Niva Travel, Chevrolet, JAC, MAN, Renault, УАЗ) 60-тан астам автомобиль модельдерін өндіруді игерді, оларды шығару шағын және ірі торапты құрастыру әдісімен жүзеге асырылады.
Ағымдағы жылдың наурыз айында «СарыарқаАвтоПром» ЖШС «KIA Motors Ресей және ТМД» компаниясымен бірлесіп «KIA»автомобильдерінің өндірісін іске қосты.
Сонымен қатар, ағымдағы жылдың шілде айында кәсіпорын базасында «АвтоВаз» және «Renault Россия» (Рено Россия) компанияларымен бірлесіп «Lada» («Niva Travel», «Niva 4х4», «Vesta», «X-RAY», «Largus’ және «Granta») автомобильдерінің және «Renault» (Рено) («Arkana» және «Kaptur») автомобильдерінің бүкіл өндірісі жолға қойылды.
Жыл басынан бері кәсіпорында 44 115 автомобиль құрастырылды, бұл өткен жылдың сәйкес кезеңінен 44,3% – ға артық (10 ай. 2020 ж. – 30 566 бірлік). Ағымдағы жылдың 10 айында 6 231 автомобиль экспортталды. Өнім Ресей Федерациясына, Беларусь, Қырғызстан, Әзірбайжан, Өзбекстанға экспортталады. Бүгінгі күні қызметкерлер саны 1 748 адамды құрайды.
Бетті дайындаған Маржан Алпыс, суреттерді түсірген автор
