Қостанай облысының әкімдігінде өңір басшысы Архимед Мұхамбетовтің төрағалығымен аймақта КВИ таралуына жол бермеу бойынша жедел штабтың кезекті отырысы өтті. Штаб отырысы барысында облыстық денсаулық сақтау және білім басқармаларының басшылары эпидахуал жайында баяндама жасады.

Қазіргі уақытта инфекциялық кереуеттердің жүктемесі 34,6%-ды құрайды. 468 адам ем алуда. Бірінші компонентпен вакцинациялауды 355 075 адам өтті, екінші компонентке келетін болсақ, оны 338 252 адам алды.

Сонымен қатар, 89 610 адам қайта вакцинацияланудан өтті, осы бағыттағы жұмыс жалғасуда. Сондай-ақ, жүкті және бала емізетін әйелдерді, балалар мен жасөспірімдерді вакцинациялау жүргізілуде, ал 10 101 адам Pfizer вакцинасын алып үлгерген.

Қостанай облыстық денсаулық сақтау басқармасының басшысы Рүстем Айтбаевтың айтуынша, халықты коронавирустық инфекцияға қарсы вакцинациялау бүгінгі күні пандемиямен күресте жалғыз тиімді құрал болып табылады.

Дүниежүзілік денсаулық сақтау ұйымының деректері бойынша ұжымдық иммунитетті қалыптастыру үшін халықтың кемінде 70% — ын вакцинациялау қажет. 2020 жылғы 21 желтоқсанда «Сomirnaty» вакцинасын еуропалық дәрілік заттар агенттігі, сол жылғы 31 желтоқсанда Дүниежүзілік денсаулық сақтау ұйымы қолдану үшін мақұлдады. Ол әлемнің 147 елінде жасөспірімдерді, жүкті және бала емізетін әйелдерді вакцинациялау және қайта вакцинациялау курстарында қолданылады. Қазақстан Республикасы да бұдан тыс қалмақ емес. Кепілдендірілген сапалы препараттармен қамтамасыз ету мақсатында Қазақстанда Pfizer-Comirnaty вакцинасы да қолданылады.

Бүгінгі таңда жүкті және бала емізетін әйелдер, сондай-ақ 60 жастан асқан адамдар сияқты халықтың жекелеген санаттары ағзаның иммундық жүйесінің ерекшеліктеріне байланысты жоғары қауіп тобына жатады. Бұл санаттардың инфекция кезінде стандартты емес және ауыр КВИ жұқтыру ықтималдығы жоғары.

Республиканың бас санитарлық дәрігерінің қаулысына сәйкес осы вакцинациялауға 12 жастан 18 жасқа дейінгі жасөспірімдер, жүкті және бала емізетін әйелдер және 60 жастан асқан адамдар мен медицина қызметкерлеріне ревакцинация жасалады.

Осының негізінде Қостанай облысында Денсаулық сақтау басқармасы Pfizer-Comirnaty вакцинасын қолдана отырып, КВИ-ге қарсы вакцинацияны ұйымдастыру және жүргізу жөніндегі іс-шаралар жоспарын іске асыруда.

–Вакцинацияны үйлестіру үшін денсаулық сақтау басқармасының, сан-эпид бақылау департаментінің және білім басқармасының бірлескен бұйрығымен облыстың әрбір өңірі бойынша кураторлар тағайындалды. Облыста вакцинацияны 190 стационарлық және 31 медициналық ұйым жылжымалы егу жүйесін жүргізеді. 426 медицина қызметкері жұмылдырылды. Облысқа вакцинаның 112 230 дозасы жеткізілген. Жүкті әйелдер арасында жоғары ауруды атап өту керек. Бүгінгі таңда 131 әйел емделуде, олардың барлығы вакцинациядан өтпеген. Бүгінгі күні 140 жүкті әйел вакцинацияланды, бұл жоспардың тек 2,5%-ын ғана құрайды. Pfizer-Comirnaty вакцинасын қолдану арқылы 85 жүкті, 32 бала емізетін әйел, 60 жастан асқан 1 242 адам, сондай-ақ 683 медицина қызметкері қайта вакцинацияланды.Осы бағыттағы жұмыстар жалғасуда,-деп атап өтті Р.Айтбаев.

ҚР Бас санитарлық дәрігерінің қаулысына сәйкес ағымдағы жылдың 14 ақпаннан бастап барлық оқушылар санитарлық нормаларды сақтай отырып, оқудың штаттық режиміне өтеді. Балаларды вакцинациялау Қостанай қаласы мектептерінің 3 медициналық кабинетінде ұйымдастырылған, медициналық кабинеттерді ашу бойынша жұмыстар жалғасуда. Мектептердегі егу пункттері санитарлық ережелердің талаптарына толық сәйкес келеді, тоңазытқыш қондырғысы орнатылған рефрижераторлық типтегі белсенді термоконтейнерлер бар. Бұл туралы Қостанай облысы әкімдігі білім басқармасы басшысының міндетін атқарушы Айман Ибраева баяндады.

–Коронавирустық инфекцияның тез таралуына байланысты балалардың қауіпсіздігі бірінші кезектегі міндеттердің бірі. Өткен аптада 7-12 ақпан аралығында облыс мектептерінде оқушылардың арасында 466 КВИ жұқтыру жағдайы тіркелді, бұл оқушылардың жалпы санының 0,5% — дан азын құрайды. Алдыңғы аптамен салыстырғанда сырқаттанушылықтың 30 жағдайға төмендеуі байқалады. Балалар ауруды асқынусыз өткізеді, карантинде 10 күннен аспайды. Қазіргі уақытта қашықтықтан оқыту форматына 763 сынып немесе 13 мыңға жуық оқушы көшірілді,-дейді А.Ибраева.

Ата-аналардың немесе заңды өкілдердің ақпараттандырылған келісімімен коронавирустық инфекциямен сырқаттанушылықты төмендету мақсатында «Пфайзер» вакцинасымен егу іс-шаралары жалғасуда.

Бүгінгі таңда білім беру ұйымдарында 12 жастан 18 жасқа дейінгі 54 мыңнан астам бала білім алуда. Оның ішінде денсаулық сақтау басқармасының мәліметі бойынша профилактикалық вакцинаны 7 962 бала немесе 14,5% алды.

Облыста барлығы 31 емхана вакцинация жүргізеді. Балалардың қауіпсіздігін қамтамасыз ету және олардың респираторлық инфекциялармен зақымдануын болдырмау үшін балаларды вакцинациялау Қостанай қаласы мектептерінің 3 медициналық кабинетінде және ата-аналардың тілегі бойынша — қалалар мен аудандар мектептерінің базасында медициналық қызметкерлердің көшпелі бригадаларымен ұйымдастырылды.

–Уақтылы жүргізілген иммундаудың пәрменділігін ескере отырып, ата-аналардың балаларды вакцинациялау туралы оң шешім қабылдауының маңыздылығын атап өткім келеді. Осыған байланысты білім беруді басқару органдары санитарлық-эпидемиологиялық қызметтермен, Денсаулық сақтау өкілдерімен бірлесіп, жасөспірімдерді КВИ-ға қарсы вакцинациялау мәселелері бойынша кәмелетке толмағандардың ата-аналарымен және заңды өкілдерімен ақпараттық-түсіндіру жұмыстарын жүргізуді күшейту керек. Мысалы, 2021 жылғы желтоқсанда Қостанай қаласының № 27 мектебінің базасында облыстық ата-аналар жиналысы өткізілді, ағымдағы жылғы ақпанда Қостанай қаласының мектептерінде БАҚ өкілдерінің қатысуымен ата-аналар қоғамдастығымен кездесулер ұйымдастырылды. Меңдіқара ауданында 4 айда ауылдық округтерге шығумен 57-ден астам кездесу өткізді,-дейді Қостанай облысы әкімдігі білім басқармасы басшысының міндетін атқарушы Айман Ибраева.

Аталған іс-шараларда вакциналарды сақтау шарттары, егу техникасы түсіндірілді, профилактикалық вакциналардың тиімділігі бойынша басқа елдерден мысалдар келтірілді, сондай-ақ ата-аналарды толғандыратын сұрақтарға жауаптар берілді.

Сырқаттанушылықтың өсуін төмендету және қауіпсіз білім беру ортасын қамтамасыз ету үшін осы бағыттағы жұмыс жалғасуда.

Отырыс қорытындысы бойынша облыс әкімі Архимед Мұхамбетов өңірлердің әкімдеріне вакцинация жұмыстарын жандандыруды және барлық мәселелерді өз бақылауына алуды, сондай-ақ халыққа вакцинация және ревакцинацияға қатысты ақпараттық-түсіндіру жұмыстарын жалғастыруды тапсырды.