Облыс әкімі Архимед Мұхамбетов Денсаулық сақтау алқасының кеңейтілген отырысын өткізді. Бұл туралы Қостанай облысы әкімінң баспасөз қызметі хабарлады.
Отырыс барысында Денсаулық сақтау, дәрі-дәрмекпен қамтамасыз ету, денсаулық сақтау объектілерін материалдық-техникалық жабдықтау және жөндеу мәселелері талқыланды. Облыстың мемлекеттік денсаулық сақтау жүйесінде 14 600 медицина қызметкері жұмыс істейді.
Қыркүйек айында Мемлекет басшысы Қазақстан халқына Жолдауында денсаулық сақтау саласын дамытудың 2023–2025 жылдарға арналған медициналық инфрақұрылымды кешенді жақсартудың басым бағытын атап өтті.
Мемлекет Басшысының Жолдауын орындау мақсатында, биыл денсаулық сақтау саласына 88,7 млрд теңге бөлінді. «Әрбір азамат үшін сапалы және қолжетімді медицина» ұлттық жобасы аясында облыста 25 амбулаториялық-емханалық нысан салу жоспарланған.
Ауданаралық көпсалалы мекемелерді жаңғырту және қайта құру үшін екі медициналық ұйым салу жоспарланған.
Биыл денсаулық сақтау нысандарының екеуіне күрделі жөндеу жүргізу жоспарланған. Мәселен, Тобыл қаласындағы «Қостанай облыстық психиатриялық денсаулық орталығы» қосалқы ғимаратының күрделі жөндеуі аяқталды.
«Қостанай қаласының №2 емханасы» ғимаратына 2 жылға жоспарланған күрделі жөндеу жұмыстары жүргізілуде. Жобаның жалпы құны 392,3 млн теңге.
Сондай-ақ жалпы сомасы 448,3 млн теңгеге 11 ағымдағы жөндеу жүргізілді. «Ауыл – Ел бесігі» бағдарламасы аясында Б. Майлин ауданы Елизаветинка ауылындағы ФАП ғимаратын күрделі жөндеу жұмыстары аяқталуда. Ахмет Байтұрсынұлының 150 жылдығын мерекелеу аясында ұлы ағартушының туған ауылында медициналық пункт салынды.
Сондай-ақ Болат Өтемұратов қорының есебінен жыл аяғына дейін Әулиекөл аудандық ауруханасының базасында құны 1,1 млрд теңге болатын инсульт орталығын ашу жоспарлануда. Жақын арада медициналық жабдықтар әкелінеді.
Медициналық ұйымдардың материалдық-техникалық базасын нығайтуға қатысты мемлекет барлық қажетті шараларды қабылдап жатқанын, жыл сайын денсаулық сақтау объектілеріне күрделі және ағымдағы жөндеулер жүргізуге қаражат бөлінетінін атап өткен жөн. Биыл медициналық жабдықтарды сатып алуға 3,4 млрд теңге бөлінді.
