Қостанай облысының оңтүстік аудандарындағы су тасқыны жағдайы әлі де күрделі. Жедел штаб өз жұмысын жалғастыруда.

Премьер-Министрдің орынбасары – Су тасқынына қарсы шараларды үйлестіру және қарғын су жүру кезеңінің салдарын жою жөніндегі республикалық штаб басшысының орынбасары Қанат Бозымбаев Қостанай облысына жұмыс сапарымен барды. Атап айтқанда, төтенше жағдай жарияланған Амангелді, Жангелдин аудандары мен Арқалық қаласындағы жағдаймен танысты.

Қанат Бозымбаев аймақ басшысы Құмар Ақсақаловпен бірге Амангелді ауданы Амангелді ауылындағы су басқан үйлерді аралап, облыс орталығына апаратын жолдардың жағдайын зерделеп, халыққа көмек көрсету бойынша еріктілер орталығына барды. Орталықтың ұйымдастырушысы Айбек Танабаев ауданға гуманитарлық көмектің әлі де келіп жатқанын айтты. Мұнда 3 күн ішінде 20 тоннадан астам азық-түлік, киім-кешек және гигиеналық құралдар жеткізілді.

Жангелдин ауданында Қанат Бозымбаев Көлқамыс ауылындағы су тасқыны болған жерге барып, сондай-ақ қарғын судан зардап шеккен Көкалат ауылының тұрғындарымен кездесті.

Ауданды әуеден бақылау барысында «Арқалық – Екідін» аудандық маңызы бар жолдағы апатты көпірге тексеру жүргізіліп, қала әкімі Екідін кентіндегі су тасқынынан қалыптасқан жағдай туралы баяндады.

Әрі қарай Қанат Бозымбаев политехникалық колледждің жатақхана ғимаратындағы құтқару пунктіне орналастырылған Қызылжұлдыз ауылының тұрғындарымен кездесті.

Су тасқынына қарсы шараларды үйлестіру және қарғын су жүру кезеңінің салдарын жою жөніндегі облыстық жедел штаб Арқалық қаласында орналасқан. Облыстың барлық аумағында облыстық, қалалық және аудандық жедел штабтар жұмыс істейді. Шығынды бағалау бойынша комиссия құрылды.

Қостанай облысының оңтүстігіндегі 75 жеке тұрғын үйді су басқан. 13 су шайған және 7 бүлінген жол (1 көпір, 6 жол жамылғысы) бақылауда. 12 елді мекенде көлік қатынасы жоқ. 1,2 мың адам эвакуацияланды, олардың 408-і балалар.

Қарғын суды сору, қаптарды төсеу жұмыстары жалғасып жатыр. Су тасқыны басталғаннан бері 686,2 мың текше метрден астам қарғын су сорылып, 16 мыңнан астам қап төселіп, 1,3 мың тонна инертті материал төгілді. Құтқару жұмыстарына 1,7 мың адам, 517 бірлік техника, 30 суда жүзу құралы және 2 ұшақ жұмылдырылған.

Жұмыс сапары барысында Қанат Бозымбаев аудан және қала әкімдерімен, облыстық қызметтер мен басқарма басшыларымен бірқатар кездесу өткізді. Вице-премьер апаттық-құтқару жұмыстарын әрі қарай жүргізу, құтқарылған адамдарды барлық қажетті заттармен қамтамасыз ету, шығынды бағалау, бүлінген үйлер мен инфрақұрылымды қалпына келтіру бойынша бірқатар тапсырма берді.

«Адамдардың қауіпсіздігін қамтамасыз ету және зардап шеккендерге көмек көрсету үшін барлық жағдайды жасау керек. Су тасқынының зардаптарын жою жұмыстары тәулік бойы жүргізілуі тиіс. Өңірлерді қалпына келтіру үшін барлық қажетті ресурстар бөлінеді», – деп қорытындылады Штаб басшысының орынбасары.

Сонымен қатар, гуманитарлық көмек те жалғасып жатыр. Арқалық қаласы мен Аманкелді және Жанкелдин аудандарында болған ірі су тасқыны қостанайлықтарды бейжай қалдырмады. Облыстың барлық аудан мен қалаларында зардап шеккен тұрғындарға гуманитарлық көмек жинау жұмыстары қызу жүріп жатыр.

Гуманитарлық көмектің алғашқы легі (1000 қап, 500 жұп қолғап, күрек және т. б.) Қостанай қаласы Қазақстан халқы Ассамблеясынанан келген еді.

«АМАНАТ» партиясының Қостанай облыстық филиалы Арқалық қаласы, Аманкелді, Жанкелдин аудандарына жалпы көлемі 20 тонна (киім-кешек, 4 тонна картоп, 1 тонна су, 6 тонна ұн, 510 кг пияз, 350 литр күнбағыс майы, 500 кг макарон өнімі, 200 кг күріш, жеке гигиена құралдары, резеңке етік, жастық, төсек-орын) гуманитарлық көмек жөнелтті.

«Ауыл» және «Ақжол» партиясының филиалдары да қаржылай көмек көрсетуде. Жергілікті кәсіпкерлер мен қоғамдық ұйымдар зардап шеккендер мен құтқарушыларды азық-түлікпен, ыстық тамақпен қамтамасыз етіп, барынша жәрдем беруде.

Гуманитарлық көмек Астанадан көптеп келіп жатыр. Қостанай облысының тумалары, сондай-ақ алаңдаушылық танытқан азаматтар жалпы көлемі 11 тонна бірінші қажеттіліктегі (матрас, көрпе-жастық, құрал-сайман, күрек, қолғап, резеңке аяқ киім, фонарь, рация, радиоактивті телефон, шам және т. б.) заттармен гуманитарлық көмек жіберді. Сондай-ақ, Алматыдан Амангелді ауданының қабылдау пунктіне 2 тонна көмек келді.

Қостанай облыстық төтенше жағдайлар департаментінің басшысы Қайрат Қасым баяндамасы бойынша, қазір тасқын қаупі солтүстік өңірлерге төніп тұр.

Жітіқара, Қамысты, Денисов, Әулиекөл, Қарасу аудандарының тұрғындарын мейлінше сақ болуға шақырды.

«Қазіргі ең қызу жұмыс Жанкелдин ауданында жүріп жатыр. Арқалық пен Аманкелдіде суда қалған елді мекендерді қалпына келтіріп, қалған судың бағытын өзгерту жұмыстары жалғасып жатыр. Назарымыз, мейлінше, Жанкелдин ауданында», – деді Қостанай облыстық төтенше жағдайлар департаментінің басшысы Қайрат Қасым.

Су астында қалған Тәуіш пен қауіп көзі әлі де сақталып тұрған Қызбел ауылында жағдай нақтыланып жатыр. Ол жақтағы энергетиктер мен байланыс қызметкерлері мүмкіндігінше желілерді қалпына келтіруге кірісіп кеткен. Осы аумақта күні бүгінге дейін 1300 – ден астам адам құтқарылған. 1500 – дей адам эвакуациялау шарасына қарсы болыпты. 16 мыңнан астам қап төселіп, қатерді жоюға 1700 адам қатысып отыр. Бой бермеген тасқынның әлегінен құтқаруға Қарағанды, Шығыс Қазақстан, Қызылорда облыстарынан арнайы жасақ шақырылды.

Бақыт ТҰРАШ, суреттер Қостанай облысы әкімінің баспасөз қызметінен алынды