Қостанай облысының әкімі Құмар Ақсақаловтың төрағалығымен облыс әкімдігінің отырысы өтті, онда өңір халқын қолжетімді интернетпен қамтамасыз ету мәселесі қаралды.
Отырыста «Қолжетімді интернет» Ұлттық жобасын іске асыру барысы талқыланды, оның мақсаты 2027 жылдың соңына дейін бүкіл Республика бойынша ауылдық елді мекендерді кең жолақты интернетпен 100% қамту.
Құмар Ақсақалов Қостанай облысында бұл көрсеткіш инфрақұрылымның белсенді құрылысының арқасында мерзімінен бұрын орындалатынын атап өтті.
«Бүгінгі таңда 13 мыңға жуық тұрғыны бар 50 ауылда антенна-мачталық құрылғылар орнатылуда. Биыл біз бұл мақсатқа 742 миллион теңге бөлдік, оның ішінде жобалауға жұмсалған шығындар да бар. Осылайша, 2026 жылдың соңына дейін 4G стандартына сәйкес сапалы мобильді интернетпен қамту 100% жеткізіледі», – деді облыс әкімі.
Ол сондай-ақ интернетпен толық қамтудың өңір үшін бірқатар артықшылықтар әкелетінін атап өтті.
«Бұл көрсеткішке қол жеткізу ауылдық елді мекендердің экономикасын дамытуға, сондай-ақ халықтың өмір сүру деңгейін арттыруға мүмкіндік береді», – деді Құмар Ақсақалов.
— Облыс бойынша 492 ауылдың 331-і 4G, 161-і 2G, 3G, тағы 29 ауылда байланыс жоқ. Осы мәселені шешу үшін байланыс операторларымен жасалған меморандумдар шеңберінде биыл 50 ауылда антенна-діңгек құрылыстарын (АМС) салу жоспарлануда. 39 ауылда мердігерлік ұйымдар анықталды. Оңтүстік өңірге басты назар аударылды, мысалы, Арқалық қаласының Екідін ауылында ұялы байланыс қазан айында іске қосылады, қазіргі уақытта металл конструкциясын орнату аяқталуда. Қалған 11 ауыл (ірі және биік АМС) бойынша жобалық-сметалық құжаттама дайындалып, бюджеттік өтінімдер берілді, олар облыстық мәслихаттың таяудағы сессиясында қаралатын болады, – деп мәлімдеді облыс әкімдігінің ақпараттандыру, мемлекеттік қызметтер көрсету және мұрағаттар басқармасының басшысы Азамат Қашиев аппараттық кеңесте.
Сондай-ақ, Beeline байланыс операторы 74 ауылда базалық станциялардың жұмысын жаңғыртуды және жақсартуды, оның ішінде 13 ауылда қосымша антенналар салуды жоспарлап отыр. Өткен жылы Красная Пресня және Буревестник ауылдарының тұрғындары байланыс сапасына шағымданды. Бұл ауылдарда халық байланыс күшейткіштерін пайдаланады. Қосымша антенналарды салу арқылы репиторлардың кедергісі жойылады. Барлық құрылыс және жаңғырту жұмыстары осы жылдың төртінші тоқсанында аяқталады деп күтілуде.
Бұл жұмыстарды аяқтау тек заманауи цифрлық қызметтерге қол жеткізуді қамтамасыз етіп қана қоймай, сонымен қатар білім беру, медицина және бизнес үшін жаңа мүмкіндіктер жасай отырып, өңірдің экономикалық базасын дамытуға және нығайтуға ықпал ететін болады.
— Біздің мақсатымыз – бұрын бекітілген жоспарларымыздың қалай жүзеге асырылып жатқанын білу болды. Жалпы, Қостанай облысының аумағында байланыс операторларымен жасалған уағдаластықтар мен жоспарлау аясындағы барлық жұмыс жоспарларға сәйкес жүргізіліп жатқанын көріп отырмыз. Қаражат бөлінді, антенна құрылыстарын орнату жоспар бойынша жүріп жатыр. Қажетті жабдық сатып алынуда және 2026 жылдың қорытындысы бойынша барлық елді мекендер сапалы мобильді интернетпен қамтамасыз етілетіні өте маңызды. Қостанай облысы еліміздің басқа өңірлерінен бұрын нәтижеге қол жеткізеді. Сондықтан биыл бұл мақсаттарға 742 млн теңге бөлінді. Біз ауылдық жерлерде сапалы интернет экономикалық тұрғыдан үлкен мүмкіндіктер ашатынын және ауыл өмірін жақсартатынын түсінеміз, – деді Қостанай облысының әкімі Құмар Ақсақалов.
Бақыт ТҰРАШ
