Қостанай облысында «KamLitKZ» ЖШС және KIA зауытының жобаларын іске қосумен өнеркәсіптік әлеуеті арта түспек. Осылайша, өңір Мемлекет басшысы белгілеген стратегияны белсенді іске асыра отырып, өңдеуші сектордың қарқынды дамуын көрсетіп отыр.
Мұнда жоғары қайта бөлу өнімдерін өндіруге және жаңа технологияларды тартуға бағытталған инвестициялық жобалар табысты іске асырылуда. Мұның жарқын мысалдарының бірі – «KamLitKZ» ЖШС зауыты және өңірдің өнеркәсіптік әлеуетін нығайтуға елеулі үлес қосатын KIA зауытының құрылысы.
«KamLitKZ» ЖШС екі зауытты іске қосуды және өндірісті оқшаулауды тереңдету жөніндегі жобаны қамтитын үш ірі жобаны іске асыруда. Инвестициялардың жалпы көлемі 240 миллиард теңгені құрайды, ал жобалық қуаттылығы жылына 45 мың тонна құйма мен 164 мың бұйымға жетеді.
Бастысы, мыңнан астам жаңа жұмыс орыны ашылады деп күтілуде. Бұл өңірдегі жұмыспен қамту деңгейін айтарлықтай арттырады. Өндіріс ошағы заманауи жоғары технологиялық жабдықтармен жабдықталған, бұл кәсіпорынға ең жоғары әлемдік стандарттарға сәйкес келетін өнімдер шығаруға мүмкіндік береді. Темір құю зауытында техникалық іске қосу жүргізіліп, өнімді құю басталды. 2024 жылы 2300 бірлік цилиндр блоктарын шығару жоспарлануда, оның ішінде 200 бірлік өндірілген. Толық қуатқа шыққан кезде зауыт облыста шойын құю бойынша көлемді шамамен бес есеге арттырады, ал республика ауқымындағы өндіріс үлесі шамамен 50% құрайды.
Бұл зауыттарды іске қосу Қостанай облысының машина жасау кластерінің позициясын нығайтуға мүмкіндік береді және тұтастай алғанда өнеркәсіп секторын дамытуға қуатты серпін береді. Өндірілетін өнім әлемдік жүк техникасын өндірушілердің қажеттіліктерін қанағаттандыруға бағдарланатын болады, ал өнімнің едәуір бөлігі ТМД және Еуропа елдеріне экспортқа жіберілмек.
Аймақ экономикасын әртараптандырудың маңызды қадамы ретінде Kia автомобиль шығаратын зауытын атап өтуге болады. Инвестиция көлемі 90 миллиард теңге және қуаты жылына 70 мың автомобиль болатын бұл жоба Қостанай облысында автомобиль жасау саласын дамытудың негізгі күші болмақ. Қазақстанда шығарылатын барлық автомобильдердің жартысынан көбі біздің өңірде құрастырылады.
Қостанайда KIA зауытының құрылысы өткен жылы басталды. 2024 жылғы мамырда Kia Corporation президенті Хо-Сунг Сонг өңірге келіп, жоба компанияның Қазақстан мен Орталық Азиядағы қатысуын кеңейту үшін маңызды қадам болып табылатынын атап өтті.
Облыс әкімдігі зауытты инженерлік-коммуникациялық инфрақұрылымның толық кешенімен қамтамасыз етіп отыр. Бұл жақын арада құрылысты аяқтауға және негізгі технологиялық жабдықты монтаждауға көшуге мүмкіндік береді. Бірінші сынақ машинасы 2025 жылдың бірінші жартыжылдығында желіден шығады деп күтілуде, ал зауыттың ресми іске қосылуы 2025 жылдың екінші тоқсанының соңына жоспарланған.
Зауыттың өндірістік қуаты Kia автомобильдерінің 13 моделін шығаруға мүмкіндік береді. Бастапқы кезеңде өндіріс Cerato, Sorento және Sportage модельдері үшін шағын түйін әдісімен жүзеге асырылады. Жобаны іске асыру 1 500 жаңа жұмыс орнын құруға мүмкіндік береді, ал өңірдің өңдеу өнеркәсібінде өнім шығару көлемі 1 триллион теңгеге ұлғайып, 50% артады.
Айта кетейік, бұл кәсіпорын Қостанай облысындағы ел тәуелсіздігі кезеңінде салынған ең ірі зауыт болады. Бір қызығы, құрылыс жұмыстарының бастапқы кестесі мерзімдердің бір жарым есе озып кетуіне байланысты оңтайландырылды.
Экономикалық тиімділіктен басқа, KIA зауытының құрылысы аймақтың кадрлық әлеуетін дамытуға оң әсер етеді. Ахмет Байтұрсынұлы атындағы Қостанай өңірлік университеті мен Dong-Eui Оңтүстік Корея университеті ынтымақтастық туралы Меморандумға қол қойды. Осылайша, біздің студенттер мен мамандар Оңтүстік Кореяда оқитын болады, бұл электр жабдықтарын пайдалану, пилотсыз автомобильдерді әзірлеу және басқа да инженерлік-техникалық мамандықтар саласында кадрлар даярлауға мүмкіндік береді.
Мемлекет осы жобаларды іске асыруға жан-жақты қолдау көрсетеді. «KamLitKZ» ЖШС үшін ауданы 30 гектар индустриялық аймақ аумағында жер учаскесі бөлінді, бұдан басқа, кәсіпорындарды үздіксіз электрмен жабдықтаумен қамтамасыз ету үшін «Батыс» қосалқы электр станциясы пайдалануға берілді.
Сонымен қатар, KIA зауытының құрылысына 70 гектар жер учаскесін бөлумен және газ, су және электрмен жабдықтауды қоса алғанда, инженерлік инфрақұрылыммен қамтамасыз ету шаралары қатар жүрді. Жалпы, осындай ауқымды өндірістердің іске қосылуы инвесторлар тарапынан жоғары сенім деңгейін көрсетеді және Қостанай облысының дамуы үшін жаңа перспективалар ашады.
Бақыт ТҰРАШ, суреттер Қостанай облысы әкімінің баспасөз қызметінен алынды
