Қостанай қаласындағы Назарбаев Зияткерлік мектебінің оқушылары Шымкент қаласында өткен «A Million Dreams› желілік арт-фестивалінде өнердің түрлі бағытында шеберлік сынасып, жеңімпаз атанды.

Фестивальдеда еліміздің 22 мектебінен 300-ге жуық оқушы әлеуметтік роликтер, бейнелеу өнері және театр қойылымдары, қолөнер, арт-фото сияқты бағыттар бойынша өнер көрсетті. Жарқын фестиваль жас таланттардың жаңа қырын көрсетуге мүмкіндік берді.

Қорытындысында үздік қатысушылар анықталып, арнайы марапаттарға ие болды.

Соның ішінде «Мюзикл» бағыты бойынша байқауда бақ сынаған Назарбаев зияткерлік мектебінің оқушылары «Үздік аранжировка» номинациясында жеңімпаз атанды.

«Біздің мектебіміздің жас суретшісі, 10 «Е» оқушысы София Цхай кескіндеме бағыты бойынша «Хрустальная палитра» номинациясын иеленді. София Лев Толстойдың «Анна Каренина» романынан үзіндіні суреттеді», – дейді жетекшісі, өнер пәнінің мұғалімі М. Махмутова.

Сайыс барысында жұмыстардың көркемдік идеясы, жаңашылдығы, техникалық орындау сапасы мен тақырыпқа сәйкес суреттелуі бағаланды.

Жан ҚҰРМАШҰЛЫ