Қостанай облысында құрылыс жұмыстары қарқынды жүргізіліп жатқан KIA автозауыты өңір экономикасын дамытуға үлес қосып қана қоймай, 1500 жаңа жұмыс орнын ашуға мүмкіндік береді. Жоба өңір тұрғындарының әл-ауқатын арттыру мен өнеркәсіптік әлеуетін нығайтуға бағытталған.

Өңір басшысы Құмар Ақсақалов құрылыс алаңына жұмыс сапары барысында жобаның маңыздылығын атап өтті.

— КIA автозауытының құрылысы – өңірдің ірі инвестициялық жобаларының бірі. Бұл жоба 1500 жаңа жұмыс орнын ашуға мүмкіндік береді. Құрылыс қатаң кесте бойынша жүргізіліп жатыр. Құрылыс компанияларының басшыларынан жұмыс барысы туралы есептер тыңдалды. Барлық процестер мұқият бақылауда, – деді облыс әкімі Құмар Ақсақалов.

Бүгінгі таңда құрылыс кезеңдерінің негізгі нәтижелері көріне бастады. Зауыттың екі цехында жабдықтардың 70%-ы орнатылды. Қажетті жабдықтар аймаққа толығымен жеткізіліп, ішкі құрылыс жұмыстарының аяқталуын күтуде.

Инженерлік инфрақұрылым толығымен тартылды. Су, газ, электр қуаты, кәріз жүйесі орнатылып, жаңа жол салынды. Құрылысқа 500-ден астам құрылысшы мен инженер жұмылдырылған.

Зауыттың ішкі жүйелері мен өндірістік желілерін реттеу жұмыстары да қарқынды жүріп жатыр. Пилоттық өндірісті 2025 жылдың жазында бастау жоспарланып отыр. Ал сериялық өндірісті осы жылдың күзінде іске қосу көзделген.

«Бұл зауыт тек ішкі нарыққа ғана емес, көрші елдерге де өнім экспорттауға жол ашқалы тұр. KIA автозауытының құрылысы аяқталғаннан кейін өңірде автокөлік өндірісінің жаңа деңгейі қалыптасып, Қазақстанның машина жасау саласындағы әлеуеті арта түседі», – деді Құмар Ақсақалов.

Бұл жоба облыстың экономикалық дамуына тың серпін беріп, тұрғындарға жаңа жұмыс орындарын ұсыну арқылы әлеуметтік мәселелерді шешуге де үлес қосады.

Бақыт ТҰРАШ, суреттер Қостанай облысы әкімінің баспасөз қызметінен алынды