Қостанай ауданына қарасты Еңбек ауылында жаңа мектеп салынып жатыр. Құрылыс аяқталуға аз қалды дей беруге де болады. Бүгінде ішкі жұмыстары жүргізілу үстінде. Пайдалануға берілетін мерзім алыс емес.

Аудан әкімі Олжас Нұрғалиев Александров ауылдық округіне барған іссапары кезінде нысанның қазіргі жай-күйімен арнайы барып танысты. Жаңадан іргетасы қаланған еңселі ғимарат алыстан көз тартады. Сыртқы жұмыстар толығымен аяқталған. Жалпы жоспар 91% орындалып тұр.

«Қазір нысанға жылу беріліп, жұмыстар жалғасып жатыр. Жобаның жалпы құны – 1,2 млрд теңге. Мердігер – алматылық «АТТМ групп» құрылыс компаниясы» ЖШС. Құрылыс кестеге сай жүргізілуде. Әзірге ешқандай қолбайлау жоқ. Материалдық қамтылым да, жұмыс күші де жеткілікті», – деп ақпарат берді ауылдық округ әкімі Алтынбек Нұртаев.

Мектеп жүз орынға шақталған. Соңғы үлгімен салынып жатыр. Оқу екі тілде – қазақ және орыс тілдерінде жүргізіледі.

Ал әзірге оқушылар осы Еңбек ауылындағы негізгі орта мектепте оқып жүр. Бұл стандартқа сай келмейтін көнетоз ғимарат 1962 жылы салынған. Негізі қаланған кезден бері мұнда ешқашан күрделі жөндеу жүргізілмеген.

Сондықтан жергілікті тұрғындар, мұғалімдер мен оқушылар жаңа, жайлы, кең мектептің ашылғанын асыға күтіп жүр. Оқу ошағы осы жылдың көктемінде пайдалануға берілмек.

Жан ҚҰРМАШҰЛЫ, суретті түсірген – Рабиға Атуллина