ҚР ТЖМ автопарктерді жаңарту жұмыстарын белсенді жүргізіп жатыр. Сол арқылы әр өңірдегі құтқару қызметтері жаңа көліктермен қамтыла бастады. Бейімбет Майлин ауданының Төтенше жағдайлар бөлімі де бұл игіліктен сырт қалмады.

Майлиндік құтқарушыларға 2024 жылы зауыттан шыққан «Toyota Hilux» маркалы көліктің кілті табыс етілді. Жол талғамайтын «темір тұлпар» арнаулы құрылғылармен, заманауи жүйелермен жабдықталған. Шамалы көлікке өткел бермейтін қиын жолдар мен қилы маршруттар бұл техникаға «бұйым» емес.

«Бұл көліктің сүйегі мықты, қуаты пәрменді, доңғалақтары төзімді. Лай-батпақ, ой-шұңқыр, омбы қар оның қарқынын оңайлықпен бәсеңдете алмайды. Ұйыққа батып, қар құрсауында қалған көліктерді сүйреп шығаруға да қауқарлы. Сондықтан бұл – құтқару операцияларына таптырмайтын тегеурінді техника», – деп жаңа көлікке келістіре сипаттама береді бөлім бастығы Дмитрий Жданов.

Жол талғамайтын көлік тұрақтандыруды қадағалағыш, тежегіштің бұғатталуға қарсы жүйесі, ойлы-қырлы жерлерден жеңіл өтуді қамсыздандыратын тетік сияқты заманауи жүйелермен жабдықталған. Сондай-ақ мұның ішінде ғаламдық басқару және радиостанция жүйесі енгізілген ақпарат алмасу құрылғысы да бар. Ал бұл басқа көліктермен немесе базамен ұдайы байланыста отыруға мүмкіндік береді.

«Бұл іздеу-құтқару операциялары кезінде, әсіресе, әр қадам нақты координацияны талап ететін сәттерде зор маңызға ие. Жүйе автокөліктің тұрған жерін бірден анықтайтын және оңтайлы маршрут құрып беретін GPS-навигацияны іске қоса алады. Радиостанция да аса қажетті құрылғы. Ол экспедицияның басқа қатысушыларымен немесе ішкі қызметтермен ұдайы байланыс орнатып отыруға керек. Бір жақсысы, бұл қашықтық та, жиілік те талғамайды, байланыс кедергілерін елемейді», – дейді Д. Жданов.

Ол құтқарушылардың құрығын ұзартқан көлік қиын жағдайда қалған аудан тұрғындарына шұғыл көмек көрсетуге көп ықпалын тигізер деген сенімде.

Жан ҚҰРМАШҰЛЫ, суретті түсірген – Мәдина Мұхамбетжанова