Жанкелдин ауданының Милісай ауылында жаңа спорт зал пайдалануға берілді.

Нысанның ашылуына қоғамдық қордың көмегі тиген. Бұл –ауыл балаларының спортпен шұғылдануына зор мүмкіндік.

С. Мәуленов атындағы мектептің жертөлесінен ашылған залға қажет дүниелердің бәрін «Қазақстан халқына» жобасы аясында құрылған «Батыр боламын» қоғамдық қоры тарту етіп отыр. Мұндағы күрес кілемі, бокс қолғаптары, соққы техникасын қалыптастыратын құралдар, үстел теннисі, тоғызқұмалақ жиынтықтары тәрізді спорт жабдықтарының жалпы құны 10 млн теңгеден асады.

«Шалғайдағы ауылға үлкен көмек көрсетіп, елдің ыстық ықыласына бөленіп жатырсыздар. Сіздерге рахмет! Ауыл балалары спортпен шұғылданып өсуі керек. Бүгін сіздердің демеулеріңізбен ашылып жатқан кең залда балалар бірнеше спорт түрімен айналысады. Мұнда енді бокс, күрес залдары, үстел теннисі, тоғызқұмалақ үйірмелері жұмыс істейін болады. Аядай ғана білім ордасының спорт залында шыныққан жас жеткіншектер келешекте үлкен жарыстарға қатысып, жоғары жетістіктерге жетіп жатса, сіздердің бүгінгі еңбектеріңіздің жанғаны, үміттеріңіздің ақталғаны сол болады деп ойлаймын», – деді ауыл әкім Ербол Досмағанбетов.

Ауыл тұрғындарының қуанышына себепші болған қор басшыларына аудан әкімінің алғыс хаты табыс етілді. Жергілікті жұрт қор өкілдеріне ат мінгізіп, құрмет көрсетті. Одан кейін іс-шара шағын спорт мерекесіне ұласты. Кілем үстінде палуандар белдесті. Білекті жігіттер қол тіресіп, кір көтерісіп күш сынасты. Жоғарғы сынып оқушылары арасында үстел теннисінен жарыс өткізілді.

Жан ҚҰРМАШҰЛЫ, суреттерді ауыл әкімдігінен