Костанай облысы Мемлекет басшысының стратегиялық тапсырмасын жүзеге асырып, үш негізгі экономикалық бағыт бойынша дамып келеді.
Ол машина жасау, қара металлургия және ауыл шаруашылығы өнімдерін қайта өңдеу. Өңірдің басым бағыттарының бірі – автомобиль жасау мен автокомпоненттер өндірісін қамтитын машина жасау саласын дамыту. Жеңіл көліктер компонентерін өндіретін локализация орталығы жуық уақытта іске қосылатын жетінші ірі өндіріс орнына айналмақ. Болашақ кәсіпорынның құрылыс барысымен облыс әкімі Құмар Ақсақалов арнайы барып танысты.
Бүгінде Қостанай облысында төрт ірі машина жасау кәсіпорны жұмыс істейді, олар жеңіл, жүк және ауыл шаруашылығы техникасын шығарады. Айта кету керек, төртінші зауыт 2024 жылдың күзіне қарай іске қосылды. Өңірдің өнеркәсіптік дамуы аясында 2025 жылдың соңына дейін тағы екі жаңа зауыт ашу жоспарланған. KIA автомобиль зауыты – жылына 70 000 автокөлік өндіру қуатымен, 1 500 жаңа жұмыс орнын ашады. Жүк көліктеріне арналған басты беріліс қораптары зауыты – 550 жаңа жұмыс орнын құрады.
Қосымша, 2026 жылдың басында автокомпоненттер шығаратын тағы бір зауыттың ашылуы күтілуде. Бұл кәсіпорын өңірдің автокөлік өндірісі кешеніндегі жетінші зауыт болмақ және қазақстандық автомобиль зауыттарын қажетті бөлшектермен қамтамасыз етеді.
Жаңа зауыт Индустриялық аймақта КІА зауытының қасында салынып жатыр. Жобаға 17 млрд теңгеден астам инвестициялық қаржы тартылды. Нысанның жалпы аумағы 30 мың шаршы метр. Қазірдің өзінде фундамент-бетон құю жұмыстары аяқталып, металл қаңқалары құрала бастаған. Жоспар бойынша, локализация орталығы осы жылдың төртінші кварталында аяқталуы мүмкін. Ал одан соң Қостанайда өндірілетін жеңіл көліктер үшін бампер, орындық және басқа да көптеген қажетті компоненттер шығарыла бастамақ.
— Нысан жобасын отандық компаниялар әзірлеп, құрылысымен өзіміз айналысып жатырмыз. Ал орталықты екіжақты меморандум негізінде корейлік компаниялар технологиямен қамтиды. Мұнда келешекте герметика, лактау-сырлау материалдарын өндіру де көзделіп отыр. Әзірге белгілісі, орталықта КІА, шевроле және қытайлық жеңіл көлік брендтерінің біріне автобөлектер әзірленеді», – дейді Allur компаниялар тобының өндірісті локализациялау басқармасының басшысы Сергей Могилатов.
Ол өңір басшысына жобаның сызбалық нұсқасын таныстырып, өндіріс орнының құрылыс жұмыстары жөнінде жан-жақты ақпарат берді. Оның айтуынша, орталық толық іске қосылған соң жаңадан 800-ге жуық жұмыс орны құрылады. Өңір басшысы мұның зор маңызға ие екенін тілге тиек етті.
Автокомпоненттерді жергіліктендіру орталығын салу – импортқа тәуелділікті азайтуға және өңірдің машина жасау кластерін нығайтуға бағытталған. Жоба жүзеге асқаннан кейін қазақстандық автомобиль зауыттарына отандық компоненттерді жеткізу қамтамасыз етіледі.
Бүгінгі таңда өңірдің машина жасау саласында 5 053 адам жұмыс істейді, ал жаңа зауыттардың іске қосылуымен бұл көрсеткіш 7 500-ден асады. Автомобиль жасау, металлургия және автоматтандыру салаларында мамандарды белсенді түрде даярлау жүріп жатыр, бұл кәсіпорындарды білікті кадрлармен қамтамасыз етуге мүмкіндік береді.
Автокомпоненттер зауытының іске қосылуы Қазақстанда автомобиль өндірісінің толық циклын құру жолындағы маңызды қадам болмақ.
«Бұл жоба қазақстандық автозауыттарды отандық компоненттермен қамтамасыз ететін елдегі алғашқы толыққанды машина жасау кластерінің негізін қалады. Машина құрастыру саласында төрт ірі зауытымыз жұмыс істеп жатыр. Соңғысын былтыр іске қосқан едік. 550 азамат жұмыспен қамтылды. Бұдан бөлек, КІА зауыты пайдалануға берілсе, 1,5 мың адам жұмысқа тартылады. Жүк көліктерінің бөлектерін шығаратын зауытта да 500-ден астам жұмыс орны құрылмақ. Ал құрылысы биыл басталған осы жетінші зауыт та көптеген адамды кәсіппен қамтығалы отыр. Жалпы, қазір машина жасау зауыттарында 5 мыңнан астам жұмыс істеп жатыр. Енді олардың саны 7,5 мыңға жетпек», – деп атап өтті Құмар Ақсақалов.
Қазір құрылыс алаңында күн сайын жүзге жуық адам жұмыс істеп жүр. Күн жылынғасын жұмысшылар қатары көбейтіле түсіп, межелі жоспарды сапалы әрі уақытылы аяқтауға күш салынбақ.
Облыс әкімінің айтуынша, бүгінгі таңда көзделіп отырған мақсат – облыс экономикасын үш бағыт бойынша қарқынды дамыту. Біріншісі – машина құрастыру саласы. Екіншіден, қара металлургия өндірісіне серпін бере түсу қажет. Үшіншіден, өңір ауыл шаруашылығы өнідмерін қайта өңдеу орталығына айналуға тиіс. Осы бағыттарда нысанаға алынған ауқымды жобалар мен жоспарлар жүйелі жүзеге асырылып жатыр.
Бақыт ТҰРАШ, суреттер Қостанай облысы әкімінің баспасөз қызметінен алынды
