Бейімбет Майлин ауданында облыстық Робот құрастыру және бағдарламалау байқауы өтті. Мақсат – оқушылардың ғылыми-техникалық шығармашылығын дамыту, жас дарындарды ынталандыру. Оған он өңірден жүзге жуық оқушы қатысып, шеберлік пен білімдерін сынға салды.

Инновациялық технология тілін, робот техникасы мен бағдарламалау салаларын меңгеру – жаңа дәуір талап етіп отырған қажеттілік. Сондықтан жас ұрпақты болашақтың мамандықтарына бейімдеу – маңызды міндет. Майлин ауданындағы облыстық байқауға арқау болған да осы идея. Оқушылар арасындағы сын С. Ерғалиев атындағы жалпы білім беретін мектепте өтті. Бұған аудандық Балалар шығармашылығы мектебі бастамашы болған.

«Робот құрастыру – механика, электроника, физика және бағдарламалау салаларының үздік табыстарын бір арнаға тоғыстырған кешенді ғылыми пән. Әр роботтандырылған модель – жеке немесе ұжымдық туынды. Осы жолы да ондай туындылардың бірнешеуі дүниеге келді. Он өңірден жиналған 98 оқушы бар білім-білігін көрсетуге күш салды. Олар өз ісінің білгірлерінен, тәжірибелі педагогтер мен байқау ұйымдастырушыларынан лайықты бағаларын алды деп есептейміз», – дейді ұйымдастырушылар.

Робот жасаушылар жарысы «Роботтар теннисі», «Құра да бағдарламала» және «Шорт-Трек» аталатын үш кезеңнен тұрды. Соңғы айналымға қатысуға ниет білдіргендер көбірек болды: ұзын саны 43 қатысушы бәсекеге түсті. Қазылар алқасы командалар дайындығының биік дәрежеде екенін, қатысушылардың берілген тапсырманы мінсіз атқаруға деген ұмтылысы жоғары болғанын айтады.

Байқау қорытындысында Б. Майлин ауданының оқушылары олқы нәтиже көрсеткен жоқ. «Құра да бағдарламала» санатында 11–14 жас деңгейіндегі оқушылар арасында аудандық Балалар шығармашылығы мектебінің тәрбиеленушілері Матвей Корнилов пен Степан Войтюк жүлделі 1-орынды жеңіп алды. Осы кезеңнің 8–10 жас деңгейіндегілер ішіндегі сынында 2-орынды ауданға қарасты Береговой негізгі мектебінің оқушысы Максим Догадин иеленді. Сондай-ақ «Шорт-Трек» санатында майлиндік оқушылар – Илья Гаврилов пен Кирилл Степаненкоға 2-орын бұйырды.

Жан ҚҰРМАШҰЛЫ, суреттер аудандық білім бөлімдерінен