Қарабалық ауданында мемлекеттік тілге қызығушылық танытқан дарынды жастар аз емес. Солардың бірі – 9-сынып оқушысы Сергей Макей. Былтыр өткен «Мемлекеттік тілге жеті қадам» облыстық байқауының жүлдегері. Талапты оқушы өз ортасына өнеге. Ол жастар қауымын қазақ тілін үйренуге шақырады.

Сергейдің отбасы Қарабалық ауданы Шадықсай аулында тұрады, ал өзі М. Горький атындағы жалпы білім беретін мектептің жанындағы интернатта жатып оқиды. Талапты оқушының қазақ тіліне деген ынтасы, сөйлеу, жазу машығы күннен-күнге артып келеді. Сергейдің тіл үйренуге деген талпынысын байқаған қазақ тілі мен әдебиеті пәні мұғалімі Елмира Қисықова оны түрлі деңгейдегі байқауларға қатыстырып жүр.

«Сергей сабақта өте зерек, ұғымтал, бағдарламаны тез меңгереді. Қазақша білуге деген ынта-жігері мені ерекше тәнті етеді. Мемлекеттік тілді үйренгісі келетін басқа оқушыларға нағыз үлгі бола алады. Бұл шәкіртімнің болашағынан зор үміт күтемін. Біліммен қаруланған, бірнеше тілді меңгерген, бойына тәлім-тәрибе жиған тұлға болып қалыптасуына біз де бар мүмкіндігімізді саламыз», – дейді мұғалімі.

Сергей «Мемлекеттік тілге 7 қадам» жобасына қатысу өтінімін былтыр оқу жылының аяғында беріп, жазғы демалыс уақытында жобаның түрлі кезеңдерінен сүрінбей өтті. Байқауда қатысушылар қазақ тілінде эссе жазып, туған өлке жайында бейнеролик түсіріп, ертегілер желісіне комикс дайындап, Абай Құнанбайұлы мен Ыбырай Алтынсариннің өлеңдерін мәнерлеп жатқа оқу міндеттелген еді. Мұның бәрі жас дарынның оң жамбасына келіп, ерекше зердесімен көзге түсті.

Айта кетерлігі, алдыңғы жылы бұл жобаға Сергейдің туған әпкесі Надежда да қатысыпты. Бірақ жүлделі орындарға ілігуге бір қадам жетпей қалған. Ал былтыр Надежданың алмаған асуын Сергей бағындырып, ата-ана мен ұстаздар үмітін ақтап, аудан намысын жоғары деңгейде қорғады. Атап айтқанда облыс бойынша үздік бестікке кіріп, 100 мың теңге қаржылай сетрификат пен алғыс хатқа ие болды. Талапты оқушы мемлекеттік тілді үйрену әрбір қазақстандыққа қажет құндылық деп есептейді.

«Біз бірлігі мен берекесі жарасқан көп ұлтты елде тұрып жатқанымызға қуанамыз. Мемлекеттік тілді меңгеру үшін ортамен, ұстаздармен көбірек қазақ тілінде сөйлесіп, мемлекеттік тілде кітаптар оқып, ән тыңдау тілді тез меңгеруге септігін тигізеді. Мен Қазақстанда туып, өмір сүріп жатқандықтан, қазақ тілін білу әр азаматтың қасиетті парызы деп білемін. Сондықтан жастар қауымы қазақ тілінің қолданыс аясын кеңейтуге үлес қосқанын қалаймын», – дейді Сергей.

Жалпы, ауданда мемлекеттік тілді насихаттау үшін барлық жағдай жасалған. Тілдерді оқыту орталығында тегін курстар жемісті жұмыс істеп келеді. Биыл Қарабалық ауданы әкімдігінің Ішкі саясат бөлімінде мемлекеттік-әлеуметтік тапсырыс аясында қазақ тілін меңгергісі келетін отбасыларға арналған арнайы жоба да қарастырылған. Бұл бағыттағы жүйелі жұмыс жалғасын тауып, тіл мәртебесі арта түсетініне сенім мол.

Жан ҚҰРМАШҰЛЫ, суреттер аудандық білім бөлімдерінен