Қостанай қаласында жолдарды қардан тазарту және су тасқыны қаупі бар аймақтардың көктемгі қарғын суға қаншалықты дайын екендігі тексерілді.

Облыс әкімі бастаған делегация қаланы аралап шықты. Оған жергілікті атқарушы билік өкілдері, коммуналдық қызмет және полиция мен төтенше жағдай қызметкерлері қатысты. Естеріңізге сала кетейік, сарапшылардың, оның ішінде «Қазгидромет» мамандарының болжамы бойынша, өткен жылғы ауқымды су тасқыны биыл да қайталануы мүмкін.

Бүгінгі таңда барлық күш табиғаттың кез келген қауіп-қатерін азайту үшін жағдай жасауға бағытталған. Қостанай облысының әкімі Құмар Ақсақалов пен қала басшысы Марат Жүндібаев жұмыс сапары аясында бұл жұмыстың қалада қалай жүргізіліп жатқанына мониторинг жүргізді.

— Көшелерді тазартудың белгілі бір алгоритмі бар. Алдымен, кезекте бірінші және екінші санаттағы жолдар ретке келтіріледі. Дәл орталыққа келетін болсақ, біз сәл кешігіп келеміз, өйткені екі-үш күн бұрын қар жауды, қайтып басып қалды. Бірақ біз коммуналдық қызметтерге тапсырма бердік. Олар жуырда барлық қарды шығарады. Қаражат бар, қосымша ақша қажет емес, – деп атап өтті Марат Жүндібаев.

Қазіргі таңда Қостанай-2 ауданына қатысты сұрақтар бар. Мұнда қауіп-қатер аймағында 30-ға жуық жеке аула бар. Жастар ресурстық орталығының еріктілері оларды қардан тазартуға көмектесіп жатыр. Олар ең алдымен жалғызбасты қарттарға назар аударады. Олардың үйлері көктемде жер асты және еріген суларға батып кетеді. Еріктілер бұл сәтті күтпейді. Олар қазір қарды тазалауға кіріскен.

Өз кезегінде, өңір басшысы Құмар Ақсақалов сапар барысында бизнес субъектілерінің жұмысы туралы бірнеше рет ескертулер жасады.

— Қаланың орталығында көптеген коммерциялық ұйымдар орналасқан, полицейлер кәсіпкерлермен белсенді жұмыс жүргізуі керек. Мен көптеген аумақтардың нашар тазаланғанын көріп тұрмын. Бұл жеке секторларға да қатысты, мұнда адам бойымен бірдей биіктікте қар үйіліп жатыр, олай болмауы керек. Бұл тек кәсіп иелеріне ғана емес, бүкіл көшеге қауіп төндіреді, – деп атап өтті облыс әкімі Құмар Ақсақалов.

Бірінші кезекте «Юбилейный» шағын ауданында Абай атындағы жалпы білім беретін мектебі болды. Бұл жерде техника жұмыс бар, сондай-ақ жоғары сынып оқушылары қар тазалауға белсенді қатысуда.

Бұдан соң облыс әкімі №16 бөбекжай-бақшасының маңындағы аумақтың жай-күйіне қатысты ескерту жасады.

— Неліктен балабақша учаскесі соншалықты нашар тазартылды, онда қандай жұмыс жүргізілуде?-деп сұрады облыс әкімі.

— Өтінім бойынша көлік бүгін-ертең келуі керек, барлығы тазаланады, – деп жауап берді Қостанай облысы білім басқармасының басшысы Айман Ибраева.

— Сіз уақытты жоғалтасыз, ертең мұның бәрі қалқып кетеді, мәселені дереу шешуіңіз керек, – деді аймақ басшысы Құмар Ақсқалов.

Бұдан соң делегация Энгельс көшесіндегі жеке үйлерге ат басын бұрды. Қазіргі уақытта онда еріктілер жұмыс істеп жатыр. Марат Жүндібаев атап өткендей, бұл аумақта тәулік бойы бекет орнатылған, штаб жұмыс істеп тұр. Мұнда әр мекен-жай бойынша өтінімдер келіп түседі.

— Өткен жылы 375 миллион теңге бөлінді, біз арық жасадық, бүгінде ол жұмыс істейді. Биыл суды ағызатын боламыз, – деді қала әкімі Марат Жүндібаев. – Жер асты суының деңгейі төмендеді, бүгінгі күні жертөлелерде су жоқ, шағымдар түспеді. 12 наурызда облыс бойынша 200-ге жуық аула тазартылды. Қалада 25 үй қардан босатылды, Қостанай-2 ауданында 30-ға жуық үй су тасқынына ұшырады, оның 15-і тазартылды.

Бұдан соң облыс әкімі бастаған делегация «Әуежай» шағын ауданында және «Дружба» ауылында, сондай-ақ Тобыл өзеніне іргелес аумақтарға мониторинг жүргізді. Мердігер ұйымдар қала аумағынан жалпы сомасы 550,6 млн теңгеге 528,7 мың текше метр қар шығарды, өткен 2024 жылы 832,5 мың текше метр қар шығарған. Қосымша қаланың 172 ауласында қардан тазарту жұмыстары жүргізілді, барлығы 550 аула. Әлеуметтік нысандар бойынша 67 ұйымнан 9250 текше метр қар шығарылды. 84 бизнес субъектісіне ұйғарым беріліп, қаланың жергілікті полиция қызметі іргелес аумақтарда қар мен мұзды уақтылы тазаламағаны үшін 101 ескерту жасады. Су тасқынына қарсы іс-шараларды жүргізу үшін Қостанайда 400-ден астам адам, 396 бірлік техника жұмылдырылды.

Сонымен қатар, өңір басшысы Қостанайдың білім беру мекемелері мен шалғайдағы шағын аудандарын тексерді. Жұмыс сапарының соңғы нүктесі жағалаудағы «Колесные ряды» болды. Өткен жылдың желтоқсан айында жалпы ауданы 4,5 гектардан асатын 69 жер учаскесін сүру туралы қаулы қабылданды. Мұның бәрі – су тасқыны кезінде үлкен қауіп төндіретін үйлер. Бүгінгі күні нарықтық құны бойынша 31 үйдің бағасы дайын. 20 наурызға дейін бағалау жұмыстары толығымен аяқталады. Кейбір адамдар қауіпті тұрғын үйден кетіп, пәтерлерге көшіп үлгерді.

— Жылдамдату керек. Бұл үшін қаражат бар, – деп қорытындылады облыс әкімі Құмар Ақсақалов. – Қар тазалауға келетін болсақ, алдағы 15–20 күн ішінде біз ең алдымен барлық су өткізгіш құрылыстарымыздың, жолдарды, нөсерлерді және т. б. тазалау жұмыстарын күшейтуіміз керек. Олар бизнес субъектілері мен тұрғын үй секторы бойынша өтуі керек. Екеуі де өз аумақтарын қардан өз бетінше тазартуға міндетті. Біздің міндетіміз – су басу қаупін азайту.

Бақыт ТҰРАШ, суреттер Қостанай облысы әкімінің баспасөз қызметінен алынды