Биыл облыста мыңға жуық жас әскерге шақыртылмақ. Бұл жолы мерзімді әскери қызметке, Қарулы Күштерге және басқа да әскерлер мен әскери құрылымдарға 1997–2006 жылдар аралығында туғандар аттанбақ.

Әскерге шақырту кейінге қалдыруға немесе босатуға құқығы жоқ азаматтарға, сондай-ақ 27 жасқа толмаған және әскерге шақыру бойынша әскери қызметтің белгіленген мерзімін өткермеген оқу орындарынан шығарылған адамдар арасында жүргізіледі.

Қостанай облысы Қорғаныс істері жөніндегі департамент басшысының орынбасары, полковник Қазбек Ахметовтің сөзінше, осы жылы көктемгі әскерге шақыру науқаны мерзімінде шекара қызметі қатарына 110 адам, Қарулы Күштер сапына 493 адамды аттандыру жоспарланып отыр.

«Сондай-ақ, Мемлекеттік күзет қызметіне – 14 адамды, Ұлттық ұланға – 346 адамды шақыру көзделіп отыр. Жалпы алғанда – 963 әскерге шақырылушы бар. Олар заңды түрде кейінге қалдырылмайды және әскерге шақырудан босатылмайды. 2025 жылға Қостанай облысының жергілікті әскери басқару органдарында 23556 әскерге шақырылушы әскери есепте тұр. Олардың ішінде, шақырылуға жататыны 2251адам, жатпайтыны 21305. Шақырылмайтындар ішінде шақыру учаскелеріне 2058 адам тіркелген. Ал 2393-і отбасылық жағдайға байланысты кейінге қалдырылып отыр», – дейді полковник Қазбек Ахметов.

Әлі мыңдаған шақырушы түрлі себептермен әскерден қалып отыр. Олардың қатарында білім алушылар, денсаулық жағдайы жарамайтындар және білім беру ұйымдарының оқытушылары бар. Әскери есептен шығарумен немесе шығарусыз азайғандар саны – 1429 адам болса, 1779-ы мерзімді әскери қызметке шақырудан босатылғандар екен.

Бақыт ТҰРАШ, суреттер Қостанай облысы әкімінің баспасөз қызметінен алынды