Қостанай облысының әкімі Құмар Ақсақалов жұмыс сапарымен Арқалыққа барып, құрылыс және жаңғырту жұмыстары жүргізіліп жатқан негізгі нысандарды аралап, сондай-ақ қаланың әлеуметтік-экономикалық дамуы бойынша кеңес өткізді. Мемлекет басшысының өңірлердің теңгерімді дамуы жөніндегі тапсырмасын орындау аясында Арқалықта экономика, инфрақұрылым, медицина, білім беру, спорт және мәдениет салаларын дамытуға бағытталған ауқымды жобалар жүзеге асырылуда.

Сапар барысында облыс басшысы көктемгі су тасқынының алдын алу шараларын назарға алып, қаланың бірқатар нысандарын аралап, атқарылып жатқан жұмыстардың барысымен танысты. Көктемгі су тасқыны қаупін азайту мақсатында ауқымды жұмыстар жүргізілді. Солтүстік ауылында 600 метрлік топырақ үйіндісі салынды, үш су өткізу құбыры орнатылды, ұзындығы 3,1 шақырым болатын арналар қазылды, жолдар нығайтылып, нөсерлі кәріздер тазартылды. Дачный ауылында Амангелді көшесінің 1,8 шақырымына орташа жөндеу жүргізілді. Аулаларды қардан тазарту және шығару жұмыстары жалғасуда.

Қостанай облысының оңтүстік аудандары үшін «Бизнес-Көмек» өңірлік бағдарламасы жұмыс істейді, оның аясында кәсіпкерлер 1 пайыздық мөлшерлемемен несие ала алады. Бағдарлама аясында жалпы сомасы 574 миллион теңгеге 12 инвестициялық жоба жүзеге асырылуда. Олардың ішінде екі жаңа асфальт-бетон зауытының және екі жаңа қиыршық тас зауытының құрылысы бар. Бұл кәсіпорындар жол жабыны мен құрылыс материалдарының сапасын арттырып, қосымша жұмыс орындарын ашады.

Алғашқы кезекте аймақ басшысы жаңадан ашылатын асфальт-бетон зауыты және қиыршық тас өнідіретін кешендерге қондырғыларды орнату жұмыстарының жай – жапсарына қанықты. Кәсіпорын қуаттылығы сағатына 105 тонна өнім өндіруге қабілетті. Қытайда жасалған РД-105 қондырғысы Қостанай қаласындағы «ЛУДЕ-КАЗ» бірлескен кәсіпорнымен» жеткізілуде. Бұл жөнінде «ARQALYQREVSERVIC» ЖШС директоры Виктор Суровцев әңгімеледі. Зауыт алдағы сәуір-мамыр айларында іске қосылмақ.

«Республикалық маңызы бар жолдарға мән беріледі. Жолдар жөнделіп жатыр. Дер кезінде жұмыс бастағалы отырсыздар, жобаға қолдау болады», – деді Құмар Ақсақалов.

Көлік желілерін дамыту қаланың экономикалық өсуінде маңызды рөл атқарады. Өңірдің дамуына ықпалы тиетін «Жезқазған – Петропавл» көтерме жолы жөндеуден өтуде. Облыс әкімі мердігерлермен жүздесіп, жұмыс барысына қанықты. Жергілікті «Алюминстрой» ЖШС-нің де жол құрылысында үлесі бар. Жол бойындағы суағар құбырларды жаңғыртуда. Жол құрылысына қажетті қиыршық тастар тасымалданған.

2023 жылы Арқалықтан Ақмола облысының шекарасына дейінгі 38 шақырым жол жөнделді. 2024 жылы Арқалықтан Ұлытау облысының шекарасына дейінгі 87 шақырым жолды жаңғырту жұмыстары аяқталады. Жалпы, 125 шақырым жол жаңартылады.

Арқалық әуежайы 30 жылдан астам уақыт бойы жұмыс істемеді. Оны қайта жаңғырту бағдарламасы аясында терминалды, ұшу-қону жолағын және перронды жаңарту жоспарланған. Әуежайдың қайта ашылуы қаланың көлік қолжетімділігін жақсартып, жолаушыларға ыңғайлы жағдай жасайды.

Бұдан соң қала іргесіндегі Северный кентінің Пролетарский көшесінде су тасқынының алдын алу үшін жұмыстарымен танысты. Жол қапталдарынан арықтар қазылып, құм салынған қапшықтардан бекініс соғылған.

Қала әкімі Әмірхан Асанов су тасқынына жол бермеу үшін атқарылып жатқан жұмыстардың жай – жапсарымен өзі таныстырып шықты. Дачный кентінің Аманкелді көшесінде де жол бойынан арық қазылып, су өткізетін құбырдың ауқымы кеңейтілген. Облыс әкімі көшелер мен үй аулаларынан қар шығаруды қарқындата түсу қажет екенін айтты. Қар шығару жұмысына ел болып жұмылу қажеттігін тапсырды.

Сапардың бірінші күні Арқалық өңірлік ауруханасын аралаумен аяқталды. Атқарылып жатқан жұмыстар жөнінде аурухананың бас дәрігері Самат Исламов баяндап берді. Мұнда перзентхана күрделі жөндеуден өтуде. Жоба құны 1 млрд 191 млн теңге. Жөнделген бөлмелерге заманауи медициналық қондырғылар орнатылған. Денсаулық сақтау жүйесін жаңғырту аясында перзентхана мен ауруханаға күрделі жөндеу жүргізілуде. Денсаулық сақтау мекемелері заманауи МРТ аппаратымен және ангиографпен жабдықталады, бұл диагностика мен емдеу деңгейін едәуір арттырады. Болашақта бұл Арқалық, Амангелді және Жангелдин аудандарының шамамен 77 мың тұрғынын медициналық қызметтермен қамтамасыз етеді.

— Бұл аурухананың өңірге қажеттілігі жоғары. Көршілес аудандардан келіп, ем алушылардың қатары да арта түсері анық. Сондықтан, алдағы уақытта аурухананың мүмкіндіктерін арттыруды жіті қарастыратын боламыз», – деді облыс әкімі Құмар Ақсақалов.

Қостанай облысының әкімі Құмар Ақсақалов Арқалықтағы жұмыс сапарының екінші күнінде құрылысы басталғалы жатқан мектеп-интернаттың құрылысымен танысты. Қала әкімі Әмірхан Асанов құрылыстың тынысы жайлы ақпарат берді.Бұл жұмыс көптен бос тұрған ғимаратты қайта қалпына келтіру арқылы жүзеге асады. Жоба құны 824,4 млн теңге. Құрылысты демеушілік көмек арқылы жергілікті мердігер «Дюссемстрой» ЖШС жүргізеді.

— Қаладағы заманауи спорт инфрақұрылымын қалыптастыру маңызды бағыттардың бірі болып табылады. Арқалықта бес жаңа спорт нысанының құрылысы жүріп жатыр, олардың ішінде.Ол ауылдық жерлерден шыққан дарынды балаларға арналған спорт интернаты, екі жаңа дене шынықтыру-сауықтыру кешені, күрес залы және бұрынғы «Қазақстан» кинотеатрының ғимаратын спорт кешені ретінде қалпына келтіру. Бұл жобалар жастарды спортпен шұғылдануға көптеп тартуға және болашақ чемпиондарды дайындауға мүмкіндік береді, – деді облыс әкімі Құмар Ақсақалов.

«Дене тәрбиесі және спорт» саласын дамыту үшін «мамандандырылған күрес залы» тұрғызылмақ. Жоба құны 444,4 млн теңге. Мердігері «Гранд Лидер Строй» ЖШС. Алматылық мердігер демеушілік көмек арқылы тұрғызады. Бұрынғы «Қазақстан» кинотеатры ғимаратын ауысымдық көлемі 40 адамға негізделген спорт орталығына айналдыру жұмыстары жүргізілмек. Жоба құны 449 млн теңге.

Сондай-ақ, жылдар бойы бос тұрған ауыл шаруашылығы басқармасының ғимараты қайта жөнделіп, Арқалық педагогикалық институтының оқу корпусына айналмақ. Бұрынғы ауыл шаруашылығы басқармасының ғимараты педагогикалық институттың жаңа корпусына айналдыру үшін қайта жөндеуден өтуде. Жоба құны 1 млрд 926 млн 700 мың теңге. Құрылыс туралы институт ректорының міндетін атқарушы Талгат Ещжанов таныстырды.

Жыл соңына дейін 15 жыл бойы жұмыс істемеген «Горняк» мәдениет сарайын және Ашутас ауылындағы мәдениет үйін күрделі жөндеу жұмыстары аяқталады. Бұл өзгерістер қала мен облыс тұрғындары үшін заманауи білім беру және мәдени орта қалыптастыруға мүмкіндік береді.

— Арқалықты кешенді дамыту оны өмір сүруге, жұмыс істеуге және демалуға қолайлы қалаға айналдыруда. Жаңа жобаларды енгізу және инфрақұрылымды жаңғырту экономикалық өсуді ынталандырып, өмір сүру сапасын жақсартып, өңірдің инвесторлар үшін тартымдылығын арттырады. Бұл бағыттағы жұмыстар жалғасуда, алда – жаңа мүмкіндіктер мен жетістіктер, – деді Құмар Ақсақалов.

«Студенттер мен оқытушыларға қолайлы жағдай туғызылып, құрылыс нысаны мейлінше сәулетті жасалуы керек. Аралық қабырғаларын әйнектен жасап, заманауи озық үлгідегі жабдықтармен қамтылуы қажет. Институтқа университет мәртебесін беру мәселесі таяу күндері шешімін тауып қалады», – деді облыс әкімі Құмар Ақсақалов.

Қалалық мәдениет сарайына күрделі жөндеу жүргізілуде. Жоба құны 1 млрд 217 млн теңге. Мердігері «RAKADA GROUP» ЖШС. Облыс әкімі бұл нысанды да назардан тыс қалдырмай құрылыс мердігеріне жұмысты жеделдетуді тапсырды.

Сапар соңында облыс әкімі Құмар Ақсақалов қала әкімдігінің мәжіліс залында қаланың даму перспективасы бойынша кеңес өткізді.

«Арқалықты қаржыландыру жыл сайын артып келеді. Едәуір назар аударылып жатыр. Жылумен жабдықтау жүйесі тозығы жеткен қала болатын. Кезең-кезеңмен қалыпқа келтірілуде. Ақаулар саны азайды. Сумен жабдықтауға да көңіл бөлініп, нәтижесінде ақау саны екі есеге дейін төмендеді. Ауылдарды сумен қамтуды да жалғастыратын боламыз. Жол саласының да мүмкіндігі артып келеді. Кейінгі екі жылдың ішінде Арқалық қаласының аумағында 145 шақырым жол жөндеуден өтті. Родина, Фурманов, Восточный, Ашутасты ауылдарында 55 көше жөнделді. Республикалық маңызы бар жолдар жөнделіп жатыр. Биыл Арқалықтың тұрғындары Астанаға жақсы жолмен баратын болады. Ұлытау облысына дейін баратын 87 шақырым жолды биыл салып бітіреміз. Жаңа асфальтталған жол болады. Мұндай жол ол жерде ешқашан болмаған. Болашақта оңтүстіктен жүк таситын машиналар Арқалық арқылы өтеді. Жолға жауап беретін азаматтардың есебінше күн сайын 2 мыңнан аса машина өтеді. Аэропорт жөнделіп, жыл соңына дейін жұмысын бастайды. Астанадан, Қостанайдан ұшатын рейстер кестесі қарастырылып жатыр. Сондықтан, Арқалық – үлкен көлік-логистикалық қала болады», – деп атап өтті облыс басшысы.

Кеңесте Құмар Іргебайұлы қаланың дамуы бойынша толғамды сараптама жасап, қала әкімі Әмірхан Асановтың баяндамасын тыңдады.

Сондай –ақ, Ы. Алтынсарин атындағы Арқалық педагогикалық институты ректорының міндетін атқарушы Талгат Ещжанов, «Arkalyk Qus› ЖШС құрылтайшысы Максим Божко, «АВ Agro-KZ» ЖШС, «Аркалык Агро KZ» ЖШС инвестициялық жобаларының жетекшілері Нұрқанат Тәжнияз бен Мұрат Аманжоловтардың есептеріне де ден қойды.

Жиынды қорытындылай келе облыс әкімі Құмар Ақсақалов қала басшылығына көктемгі су тасқынының алдын алу шараларын бәсеңдетпеуді тапсырды.

Тұрғын үй құрылысын жетілдіру, қаланы абаттандыру, білім беру, денсаулық сақтау салалары бойынша да атқарылып жатқан жұмыстардың ауқымды екенін алға тартты. Оңтүстік өңір тұрғындары үшін ең төменгі есептік көрсеткіш 1 пайызбен несие берілуде. Осы өңірлерге келіп жұмыс істеймін деген медицина мамандарына 5 млн теңге шамасында көтерме жәрдемақы беріледі. Баспанамен қамтуға да мүмкіндік бар. Құрылыс жұмыстары толастамайды. Жаңа балабақша салынады. Бес бірдей жаңа спорт нысаны бой көтереді. Үйлер, ғимараттар жөнделеді.

Бақыт ТҰРАШ, суреттер Қостанай облысы әкімінің баспасөз қызметінен алынды