Наурыз мейрамы қарсаңында Қостанай ауданында жаңа пәтерлердің кілтін табыстау рәсімі өтті. Мемлекеттік тұрғын үй саясаты аясында Тобыл қаласында 91 отбасы көптен күткен баспанасына қол жеткізді. Қостанай облысының әкімі Құмар Ақсақалов жаңа қоныстанушыларға кілттерді табыстап, халықты қолжетімді баспанамен қамтамасыз ету – мемлекеттің басты басымдықтарының бірі екенін атап өтті.

Мемлекет басшысының тапсырмасымен елімізде халықты тұрғын үймен қамтуға бағытталған бағдарламалар белсенді түрде жүзеге асырылуда. 2024 жылы Қостанай облысында 500 мың шаршы метрге жуық тұрғын үй пайдалануға берілді, нәтижесінде 5 мыңнан астам отбасы жаңа баспанаға қол жеткізді.

Жаңа пәтер иелерін өңір басшысы Құмар Ақсақалов құттықтады.

— Сіздерді бүгінгі қуанышты сәтпен және Ұлыстың ұлы күні – Наурыз мейраммен шын жүректен құттықтаймын! Халықты тұрғын үймен қамтамасыз ету – мемлекетіміздің әлеуметтік саясатының негізгі бағыты болған және болып қала береді. Сондай-ақ Мемлекет басшысының тапсырмасы бойынша жалға берілетін тұрғын үй сатып алуға қаражат бөлінді. Бұл жай ғана қолдау шарасы емес, әлеуметтік, экономикалық және демографиялық жағдайды жақсартудың қуатты құралы. Бұл мақсатта біз жыл сайын тұрғын үй құрылысының көлемін арттырамыз. 2024 жылдың қорытындысы бойынша 500 мыңға жуық шаршы метр тұрғын үй пайдалануға берілді, нәтижесінде 5 мыңнан астам отбасы өз пәтерін алды.

Сонымен қатар, өңірде жалдамалы тұрғын үйді сатып алу жұмыстары қарқынды жүргізілуде. 2024 жылы бұл мақсатқа 18 млрд теңгеден астам қаражат бөлініп, 940 пәтер сатып алынды. Бұл көрсеткіш 2023 жылмен салыстырғанда 5,7 есе көп.

Аталған бағыттағы жұмыстар жалғасуда. Биыл кезекте тұрған азаматтар үшін 1 000 пәтер және 253 несиеге берілетін баспана сатып алу жоспарланған, оның ішінде Қостанай ауданының тұрғындарына 100 пәтер бөлінеді.

Өңірдің дамуындағы маңызды қадам – «Астана» және «Бәйтерек» шағын аудандарының құрылысы. Мұнда 154 көпқабатты тұрғын үй салынып, 60 мыңға жуық адамды баспанамен қамтамасыз ету жоспарланған. Жалпы 1 миллион шаршы метрден астам тұрғын үй пайдалануға беріледі.

Тобыл қаласында табысталған пәтерлер тұрғындардың жайлы өмір сүруіне толықтай дайын. Жаңа тұрғын үйде 40 шаршы метрден асатын бір бөлмелі пәтерлер мен 90 шаршы метрге дейінгі кең үш бөлмелі пәтерлер қарастырылған.

Қоныс той иелері үшін бұл күн ерекше қуанышқа толы болды. Қостанай облысының әкімі Құмар Ақсақалов жаңа тұрғындарды құттықтап, олардың жаңа үйлерінде әрдайым бейбітшілік, жылулық және береке орнасын деп тіледі.

«Наурыз – жаңару мен үміттің, жарқын болашақтың мерекесі. Ол әр шаңыраққа молшылық, бақыт және келісім әкелсін!» – деп атап өтті өңір басшысы.

Бетті дайындаған Бақыт ТҰРАШ, суреттер Қостанай облысы әкімінің баспасөз қызметінен алынды