Бурабайда өткен Ұлттық құрылтайдың IV отырысында Президент Қасым-Жомарт Тоқаев Астанадан Арқалық, Торғай және Ырғыз арқылы Транскаспий халықаралық көлік дәлізіне тура шығатын автокөлік жолының құрылысын бастау туралы жариялады.

Бұл Торғай өңірінің дамуына серпін беретін ауқымды жоба екені сөзсіз. Торғай жұрты бұл жаңалықты жылдар бойы күткені рас.

Бурабайда өткен Ұлттық құрылтайда Мемлекет басшысы: «Осы тұста тағы бір маңызды инфрақұрылымдық жоба қолға алынатыны туралы жариялағым келеді. Мен Үкіметке Астанадан Арқалық, Торғай және Ырғыз арқылы Транскаспий халықаралық көлік дәлізіне тура шығатын автокөлік жолының құрылысын бастауды тапсырдым. Жаңа күре жол орталық және батыс аймақтардың арасын 560 шақырымға қысқартады. Бұл – тұтас Торғай өңірінің дамуына тың серпін беретін ауқымды жоба» – деді Қасым-Жомарт Тоқаев.

Көлік инфрақұрылымын дамыту шеңберінде «Астана – Жантеке – Егіндікөл – Арқалық – Торғай – Ырғыз» бағыты бойынша жалпы ұзындығы 791 шақырым дәлізді енгізу есебінен орталық және батыс өңірлер арасындағы жолды қысқарту жоспарлануда. Ол үшін «Астана – Жантеке», «Жантеке – Егіндікөл», «Арқалық – Торғай» жол учаскелерін жөндеумен қамту көзделген. «Ырғыз – Торғай» және «Арқалық – Егіндікөл» арасындағы жолдарды салу қажет болады. Арқалық әуежайына да реконструкция жасалады: заманауи аэровокзал салу және ұшу-қону жолағын жаңарту көзделіп отыр.

Бұдан соң Премьер-министр Олжас Бектенов Мемлекет басшысының тапсырмасын орындау бойынша өткізген жиналыста бұл мәселені қолға алды.

— Мемлекет басшысы Үкіметке Астанадан Торғай өңірі арқылы Транскаспий көлік дәлізіне тура шығатын жаңа автокөлік жолының құрылысына кірісуді тапсырды. Көлік министрлігі осыған дейін әзірленген техника-экономикалық негіздеме мен жобалау-сметалық құжаттаманы жедел өзектендіріп, қаржыландыру көздерін анықтасын. Жол құрылысына биыл кірісу қажет», – деп атап өтті Премьер-министр.

Сондай-ақ, Президенттің айтуынша, бұдан бөлек Арқалықтағы әуежайды қалпына келтіріп, жаңа аэровокзал салған жөн. Бұл жоба ішкі көлік қатынастарын едәуір жақсартады. Сондай-ақ орталық аймақтағы ауыл шаруашылығы жерлерін игеруге және мал шаруашылығын дамытуға тың серпін береді.

Әлбетте бұл қуанышты жаңалықты Торғай тұрғындары қуанышпен қарсы алды.

— Торғай өңірі үшін үлкен қуаныш! Мемлекет басшысы Қасым-Жомарт Тоқаев Ұлттық құрылтайда Астанадан Арқалық арқылы Торғайға, одан әрі батыс өңірлерге шығатын жаңа автожолдың салынатынын мәлімдеді. Бұл – көптен күткен әрі ел үшін аса маңызды шешім. Жаңа жол салынса, Торғай өңірі бұрын-соңды болмаған серпін алады. Алыс аймақтардағы халықтың орталықпен байланысы артып, тауар тасымалы жеңілдейді, ауыл шаруашылығы мен кәсіпкерлікке жаңа мүмкіндіктер ашылады. Сондай-ақ, жол қатынасының жақсаруы жастардың туған жерде тұрақтап қалуына оң әсерін тигізіп, өңірдің әлеуметтік жағдайын көтереді. Мемлекет басшысының бұл бастамасы – Торғайдың жаңа дәуірге бет бұруының нақты көрінісі. Өңірдің өркендеуі жолында қабылданған тарихи шешімі үшін Қасым-Жомарт Кемелұлына зор алғысымызды білдіреміз! Бұл – тек жол құрылысы емес, Торғайдың дамуының жаңа кезеңі, – дейді Арқалық қаласының құрметті азаматы Шөптібай Байділдин.

Бақыт ТҰРАШ, суреттер Қостанай облысы әкімінің баспасөз қызметінен алынды