Bıylǵy jazdyń ystyǵy, jaýyn-shashynnyń joqtyǵy aımaqtaǵy dándi daqyldyń ósýine aıtarlyqtaı tejeý bolyp otyr. Qýańshylyqqa baılanysty óńirimizde egin jınaý naýqany ádettegiden erte bastalyp ketti, dep habarlaıdy «Qostanaı tańy» gazetiniń saıty.

Keıbir aýdandarda astyq orý qarqyndy júrip jatyr. Ásirese, oblystyń ońtústik bóliginde egin shyǵymy tómen. Bul sharýalardyń jaǵdaıyn alańdatýda. Qansha jerden ozyq tehnologıa engizilip, ártaraptandyrý, alqaptardaǵy úsh-tórt aýysym tájirıbesi saqtalsa da, aýa raıynyń qolaısyzdyǵyna qarsy kúsh bola almaıtynyn bıylǵy jyl dáleldep berdi.

Jalpy, Qazaqstannyń soltústik bóligindegideı Reseıdiń de ońtústik oblystarynda jaǵdaı máz emes. Ylǵal bolmaǵan soń shóptiń de az ekeni belgili. Shildeniń 4-i men tamyzdyń 5-i aralyǵynda aımaǵymyzda kún raıy 30-40 gradýs aptap ystyqtan túsken joq. Dúısenbi kúni aımaq basshysy Arhımed Muhambetovtiń tóraǵalyǵymen bıylǵy kúzgi egis naýqanyn oıdaǵydaı ótkizý, tyǵyryqtan shyǵýdyń barynsha múmkindigin paıdalaný jaıynda selektorlyq agrokeńes ótti.

— Mamyr-shilde aılarynda óńirde ortasha 67,2 mm jaýyn-shashyn nemese ortasha jyldyq (107,2 mm) kórsetkishtiń 63%-y tústi. 3 aıda nebary 10-20 mm ylǵal tamǵan keıbir aýdandar bar. Osynyń saldarynan barlyq bıdaı alqabynyń 20,2% nashar, 45,7% qanaǵattanarlyq, 34% jaqsy. 9 tamyzdaǵy aqparatqa sáıkes aımaqta 1,1 mln tonnadan astam (71%) shóp shabylyp alyndy. Denısov (32%), Jitiqara (35%), Qamysty (57%), Beıimbet Maılın (57%), Áýlıekól (58%), Naýyrzym (62%) aýdandarynda kórsetkish tómen. Tipti, Qarabalyq aýdanynda shóp 63% daıyn degeni naqty aqparat dep oılaımyn. 65 do 100% oryndadyq degen qalǵan óńirlerdiń esebine kúmánimiz bar. Erteń qysta «júz paıyz daıyn» degen shópterińiz aqpannan ári aspaı qalyp júrmesin, — degen oblystyq aýyl sharýashylyǵy jáne jer qatynastary basqarmasynyń basshysy Jansultan Táýkenov aýdan basshylaryna eskertý jasady.