Қостанай облысы әкімдігінің мәдениет басқармасы және Е. Өмірзақов атындағы облыстық филармониясы «Рухани жаңғыру» бағдарламасының «Жаһандық әлемдегі заманауи қазақстандық мәдениет» арнайы жобасы аясында 2018 жылдан бастап дирижерлердің халықаралық форумын өткізіп келеді. Биыл да бұл игі дәстүр жалғасын тауып, ҚР Тұңғыш Президенті күніне орай ұйымдастырылды.
Форумның мақсаты – ұлттық музыкалық дәстүрлерді дамыту, жастарды патриоттық тәрбиелеу, ұлттық өнер мен рухани дәстүрлерді насихаттау, жақын және алыс шетелдердің дирижерлері арасында музыкалық тәжірибемен алмасу.
Биыл дирижерлер форумы Қазақстан Тәуелсіздігінің 30 жылдығын мерекелеу аясында және Қазақстан Республикасының Тұңғыш Президенті күніне орайластырылған. Бұл іс-шараға Қостанай облысының әкімі Архимед Мұхамбетов қатысты.
Форумға Ресей, Өзбекстан, Қазақстанның атақты дирижерлері мен әртістері қатысты. Концерттік бағдарламада Қазақстанның жетістіктері, Елбасының мәдениет саласын дамытуға назары, Қазақстанның халықаралық қоғамдастықтағы имиджін ілгерілетудегі рөлі; қазақстандық композиторлардың шығармалары, Елбасының «Город мой», «Сары арқа» сөздеріне жазылған әндері және әлемдік классика – Штраус, Верди, Бизе шығармалары орындалады.
Форумға Өзбекстанның халық әртісі, профессор Фарух Садықов, Қазақстан Республикасының Мемлекеттік академиялық симфониялық оркестрінің дирижері Эмзе Мүслім, Нұр-сұлтан қаласы Мемлекеттік академиялық филармониясы симфониялық оркестрінің көркемдік жетекшісі және дирижері Берік Батырхан, дирижер, Қазақстан Республикасының Еңбек сіңірген қайраткері, «Дарын» мемлекеттік жастар сыйлығының лауреаты Дәурен Ғлымов Дәурен Жанашұлы, Батыс Қазақстан облысы әкімінің эстрадалық-симфониялық оркестрінің бас дирижері Никита Говоров, қазақ халық аспаптар оркестрінің бас дирижері Берік Оразалин қатысты.
Жиналған қауымды өңір басшысы Архимед Мұхамбетов құттықтады.
— Сіздерді мемлекеттік мереке-Қазақстан Республикасының Тұңғыш Президенті Күнімен шын жүректен құттықтаймын! Тұңғыш Президент күні-бұл тарихи таңдау күні және Қазақстандағы халық бірлігі мен келісім күні. Еліміздің Тұңғыш Президенті Нұрсұлтан Әбішұлы Назарбаев тарихқа егемен Қазақстанның барлық жетістіктерімен байланысты адам ретінде, бүкіл қызметі өз халқына, Отанына қызмет етудің жарқын үлгісі болып табылатын әлемдік ауқымдағы көрнекті саясаткер ретінде мәңгілікке енді. Міне, 30 жыл бойы Қазақстан өзінің әлеуметтік-экономикалық және саяси дамуында әлемдік үрдістер арнасында жүріп келеді. Өз жетістіктерімен, қоғамдық-саяси өмірдегі терең өзгерістерімен біздің мемлекетіміз әлемдік қоғамдастықтың мойындауына ие болды және онда лайықты орын алды. Әрине, бірінші кезекте Елбасының дана саясатының арқасында. Сіздерді Тұңғыш Президент күнімен шын жүректен құттықтаймын! Біздің Отанымыз – Қазақстан Республикасы дамып, нығайып, гүлдене берсін, – деді ол.
Қостанайлықтар көршілес елдерден келген және жергілікті өнерпаздардың өнерін тамашалады.
Маржан Алпыс, суретті түсірген автор
