Мереке орай Мемлекет басшысы ақпараттық кеңістікті дамытуға қосқан зор үлесі үшін бұқаралық ақпарат құралдары қызметкерлерін мемлекеттік наградалармен марапаттау туралы Жарлыққа қол қойған болатын.

Марапатталған журналистер қатарында – облысымыздың екі журналисі бар. Облыс әкімі Құмар Ақсақалов бұл наградаларды иелеріне тапсырды.

Облыстық «Qostanai» телеарнасының редакторы Любовь Аверьянова Мемлекет Басшысы Қасым-Жомарт Тоқаевтың қолынан алғыс хат пен төсбелгі алды. Любовь журналистикадағы еңбек жолын Қостанай облыстық телерадиокомпаниясында бастаған. Мұнда жаңалықтар дикторы, ақпараттық қызмет корреспонденті және жаңалықтар қызметінің бас редакторы сияқты түрлі қызметтер атқарды. Қазіргі уақытта «Менің қолжазбам» бағдарламасы және «Диалог» қоғамдық-саяси бағдарламасының авторы.

Облыс әкімі Құмар Ақсақалов «Қостанай таңы» газетінің редакциясында ұзақ уақыт қызмет еткен журналистика саласының майталманы Дәмір Әбіш пен «Арқа дидары» ЖШС директоры Айтқүл Бекентайға мемлекеттік награда – «Құрмет» орденін табыс етті.

Дәмір Әбіш – облысқа белгілі ардагер журналист. Әлеуметтік проблемалармен күресуге бағытталған сыни мақалалары арқылы облыстың қоғамдық өміріне елеулі үлес қосты. Ұзақ жылдар әдебиет бөліміне де жетекшілік етіп, «Қостанай таңы» газетінде «Быды-быды» айдарын жүргізді.

Өзінің бай тәжірибесінің арқасында Айткүл Бекентай теледидарда еңбек жолын бастаған талай жас журналистерге тәлімгер болды. Айткүл Ескендірқызы – өз ісінің шебері, білікті маман. Еңбек еткен жылдары ол көптеген шәкірттер дайындады, олардың көпшілігі қазір облыстық және республикалық телеарналарда қызмет етуде.

Бұл марапат қостанайлық журналистердің кәсіпқойлығы мен шеберлігіне берілген жоғары баға деп білеміз. Олар – жаңалықтың жаршысы, жақсылықтың хабаршысы болып қоғамдық ахуалдың алғы шебінде жүретін айрықша кәсіп иелері. Бұл марапат – сөз бостандығы мен БАҚ тәуелсіздігі маңыздылығының айқын көрінісі.

Бақыт ТҰРАШ