Қостанай облысының әкімі Құмар Ақсақалов Орталық коммуникациялар қызметіндегі брифингте ауылдық аумақтарды дамытудың нақты нәтижелері туралы айтты – экономиканың өсуінен және жаңа жұмыс орындарының құрылуынан бастап, жол салу мен ауызсумен қамтамасыз етуге дейін.
Экономикалық өсім және жаңа жұмыс орындары
Қостанай облысының әкімі Құмар Ақсақаловтың айтуынша, ағымдағы жылдың 11 айының қорытындысы бойынша экономиканың барлық саласында оң динамика қамтамасыз етілді. Өңір Мемлекет басшысының экономикалық өсім қарқынын қамтамасыз ету жөніндегі тапсырмасын сенімді түрде орындап келеді. Нақты өсім 8,3 пайызды құрады, ал жоспарланған көрсеткіш 6 пайыз болған.
Жыл басынан бері 24,1 мың жаңа жұмыс орны құрылды, олардың едәуір бөлігі ауылдық жерлерде ашылды. Бұл әлеуметтік тәуелділік деңгейін төмендетуге мүмкіндік берді: атаулы әлеуметтік көмек алатын отбасылар саны 23 пайызға қысқарды.
«Ауылдарды дамыту – біздің сөзсіз басымдығымыз. Адамдар қалада ма, әлде ауылда ма өмір сүрсе де, қолайлы жағдайда тұруы тиіс. Сондықтан біз ауылдағы экономикаға, инфрақұрылымға және әлеуметтік нысандарға жүйелі түрде инвестиция салып келеміз», – деді облыс әкімі Құмар Ақсақалов брифинг барысында.
Агроөнеркәсіптік кешен – ауыл дамуының негізі
Өңір басшысы ауыл шаруашылығы облыс экономикасының негізгі саласы әрі ауылдағы басты жұмыспен қамту көзі болып қала беретінін атап өтті. Ағымдағы жылы агроөнеркәсіптік кешенді қолдауға 207 млрд теңге бағытталды, бұл өткен жылмен салыстырғанда 1,2 есе көп.
Жыл қорытындысы бойынша ауыл шаруашылығының жалпы өнім көлемі 1 трлн теңгеден асады, шамамен 7 млн тонна астық жиналды. Бұл көрсеткіштер ауыл тұрғындарының табысына және шаруашылықтардың тұрақтылығына тікелей әсер етеді.
Мал шаруашылығын дамытуға ерекше көңіл бөлінуде. Облыста 7 заманауи сүт-тауар фермасы пайдалануға берілді. 2026 жылға дейін тағы 5 ферма іске қосу жоспарланып отыр, бұл сүт өндіру көлемін екі есеге арттырып, ауылдық жерлерде қосымша жұмыс орындарын ашуға мүмкіндік береді.
Жолдар: қолжетімділік пен қауіпсіздік
Өңір басшысы Құмар Ақсақалов ауылдарды дамыту сапалы жол инфрақұрылымынсыз мүмкін еместігін атап өтті. 2025 жылы жол саласы бюджеті 103 млрд теңгені құрап, 2022 жылмен салыстырғанда 2,6 есе өсті.
Тек ағымдағы жылдың өзінде шамамен 1300 шақырым автомобиль жолы жөнделді. Оның ішінде ауылдық елді мекендерге апаратын 183 жол мен жол учаскесі қалпына келтірілді. Сонымен қатар 103 ауылда 400-ден астам ауылішілік көше жаңартылды.
«Жақсы жолдар – бұл тек жайлылық қана емес, сонымен қатар қауіпсіздік, медицинаға, білімге және өткізу нарықтарына қолжетімділік, – деді өңір басшысы Құмар Ақсақалов. – Сондықтан біз жыл сайын жол саласына бөлінетін қаржыны арттырып, ауылдық жерлерге ерекше назар аударамыз».
Ауыз су – әрбір ауылдық үйге
Ауыл халқын сапалы ауызсумен қамтамасыз ету басым міндеттердің біріне айналды. Егер 2023 жылдың басында қамту деңгейі 80,4 пайызды құраса, ағымдағы жылдың қорытындысы бойынша бұл көрсеткіш 100 пайызға жеткізілді.
Соңғы үш жылда ауылдарда орталықтандырылған сумен жабдықтауға қосылған аулалар саны 48,3 мыңнан 63 мыңға дейін артты.
Әлеуметтік нысандар: білім, медицина, спорт
Әкім соңғы үш жылда өңірде, оның ішінде ауылдық жерлерде әлеуметтік инфрақұрылым айтарлықтай нығайтылғанын атап өтті. Мектептер, балабақшалар, медициналық нысандар, спорт кешендері мен алаңдары салынды, бұл ауыл тұрғындары үшін қызметтердің қолжетімділігін арттырды.
Денсаулық сақтау саласында мамандарды аудандар мен ауылдарға тарту жұмысы күшейтілді. Көтерме төлемдердің ұлғаюы дәрігер тапшылығын екі есе қысқартуға мүмкіндік берді.
Спорт және абаттандыру – өмір сүруге қолайлы орта
Мемлекеттік абаттандыру бағдарламасы аясында ауылдық елді мекендер белсенді түрде жаңарып келеді: саябақтар мен скверлер абаттандырылуда, балалар және спорт алаңдары салынуда, көшелік жарықтандыру жаңартылуда.
«Біз әрбір ауданда нақты өзгерістерді көріп отырмыз. Ауылдар көркейіп, өмір сүруге ыңғайлы бола түсуде, және бұл жұмысты біз алдағы уақытта да жалғастырамыз», – деді Қостанай облысының әкімі. Құмар Ақсақалов.
Өңір басшысы Құмар Ақсақалов сөз соңында жыл қорытындылары ауылдарды дамыту өңірлік саясаттың басты басымдықтарының бірі болып қала беретінін дәлелдейтінін атап өтті. Жаңа жолдар, таза ауыз су, заманауи әлеуметтік нысандар мен жұмыс орындары ауылдық аумақтардың орнықты болашағын қалыптастырып, тұрғындардың өмір сүру сапасын арттыруға мүмкіндік береді.
Бақыт ТҰРАШ, суреттер Қостанай облысы әкімінің баспасөз қызметінен алынды
