Қостанай облысында ірі жиһаз өндірісі іске қосылды. Жаңа жоба өңір өнеркәсібін дамытудағы, жаңа жұмыс орындарын ашудағы және отандық өндірістің позициясын нығайтудағы маңызды кезеңге айналды, деп хабарлады облыс әкімдігінің баспасөз қызметі.

Ведомствоның мәліметінше, бұған дейін өңірге жиһаз негізінен басқа облыстардан және шетелден әкелінетін, ал жергілікті нарық көбіне шағын жеке цехтармен ұсынылған болатын. Бүгінде жағдай өзгеруде: облыста кең технологиялық мүмкіндіктерге ие заманауи толыққанды өндіріс қалыптасып келеді.

Облыс әкімі Құмар Ақсақалов тұрғын үй құрылысының артуымен бірге халықтың сапалы жиһазға деген сұранысы да өсіп отырғанын атап өтті.

Оның айтуынша, жобаны жүзеге асыру мемлекеттік бизнесті қолдау шараларының арқасында мүмкін болды. Компания Кәсіпкерлікті дамытудың кешенді бағдарламасы аясында субсидиялау тетігін пайдаланған. Қолдаудың жалпы көлемі 1,5 млрд теңгені құрады. Бұл қаражат өндірістік алаңдарды салуға және кәсіпорынды заманауи технологиялық жабдықтармен қамтамасыз етуге бағытталды.

«Осындай өндірістердің ашылуы өңір үшін экономикалық әрі әлеуметтік тиімділік береді. Екінші деңгейлі банктер кәсіпкерлікті қолдауға барған сайын көбірек көңіл бөлуде. 2026 жылғы 1 қаңтардағы жағдай бойынша олардың шағын және орта бизнеске берген несиелері 964,3 млрд теңгені құрады. Бұл 2022 жылмен салыстырғанда шамамен екі есе көп (2022 жылы – 519,8 млрд теңге) «, – деді өңір басшысы.

Сондай-ақ Қостанай облысы бүгінде өңдеуші өнеркәсіп көлемі бойынша Қазақстандағы көшбасшы өңірлердің қатарына кіріп, республика бойынша 4-орында тұрғаны хабарланды. Билік мұны өндірістік сектордың белсенді дамуы, инвестициялық жобалардың жүзеге асырылуы және мемлекеттік қолдау шараларымен байланыстырады.

2025 жылдың қорытындысы бойынша жиһаз саласы кәсіпорындары шамамен 5 млрд теңгенің өнімін өндірді. Ал 2026 жылдың бірінші тоқсанында жиһаз өндірісінің көлемі 1,4 млрд теңгені құрап, өткен жылдың сәйкес кезеңімен салыстырғанда 50,6%-ға артты.

Өңірде жиһаз саласы тұрақты өсім көрсетіп, экономиканы әртараптандырудың перспективалы бағыттарының біріне айналып келе жатқаны атап өтілуде. Саланың дамуы бәсекелестікті күшейтуге, ішкі нарықты кеңейтуге және жаңа өндірістік тізбектердің қалыптасуына ықпал етеді.

Нарықтағы негізгі ойыншылардың бірі – сериялық корпус жиһазы мен МДФ-қасбеттерін шығаруға маманданған жергілікті өндіруші. Кәсіпорынның өндірістік және қойма алаңдарының көлемі 12 мың шаршы метрден асады, ал өндірісте 120 адам жұмыс істейді.

Кәсіпорында заманауи автоматтандырылған желілер енгізілген, бұл өндірісті Қазақстандағы ең ірі жиһаз өндіріс алаңдарының қатарына жатқызуға мүмкіндік береді. Облыс әкімдігінің мәліметінше, мұнда өнім көлемімен қатар, нарықтың заманауи талаптарына сай сапаға да ерекше мән беріледі.

Кадрлық әлеуетке де айрықша назар аударылуда. Кәсіпорын қызметкерлерінің орташа жасы 30–35 жасты құрайды. Билік өкілдерінің айтуынша, бұл жаңа буын білікті мамандардың қалыптасып келе жатқанын және жұмысшы мамандықтарының тартымдылығы біртіндеп артып отырғанын көрсетеді.

Бүгінде кәсіпорынның Астана және Алматы қалаларында филиалдары, сондай-ақ Ақтөбе, Орал және Көкшетау қалаларында қоймалары жұмыс істейді. Өндірушінің өнімдері Қазақстан мен Ресейде сұранысқа ие.

Компания өндіріс көлемін және дайын жиһаз жеткізу географиясын кеңейтуді жоспарлап отырғанын да мәлімдеді.

Қостанай облысы әкімдігінде осындай өндірістерді іске қосудың экономикалық тиімділігі қазірдің өзінде байқалып отырғанын атап өтті. Өңірде салық түсімдерінің артуы, импорттық өнімдерге тәуелділіктің төмендеуі және отандық өндірушілердің ішкі нарықтағы позициясының нығаюы күтілуде.

Бақыт ТҰРАШ, суреттер Қостанай облысы әкімінің баспасөз қызметінен алынды