Қостанайда Ғазиз Байтасов атындағы XXI республикалық мемлекетаралық жас жол инспекторлары слеті басталды. Он күн бойы Қазақстан аймақтарынан және ТМД-ның 6 мемлекетінен келген 180-нен астам мектеп оқушысы жол қозғалысы ережелері, шеберлік және командалық жұмыс бойынша жарысқа түседі.
Жас жол инспекторларының ХХІ республикалық мемлекетаралық слетінің ұлы ағартушылар мен қоғам қайраткерлерінің құтты мекені – қасиетті Қостанай жерінде өтуі бекер емес. Бүгінгі айтулы шараға Қостанай облысының әкімі Құмар Ақсақалов қатысып, жас патриоттарға сәттілік тіледі. Слеттің салтанатты ашылу салтанаты 14 тамызда Қостанайдың орталық алаңында өтті.
«Өткен ХХ республикалық слетте жеңісті Қостанай қаласындағы № 19 мектептің командасы жеңіп алған болатын. Биылғы слетке Қазақстанның барлық өңірі мен ТМД елдерінен жас инспекторлар қатысуда. 180-нен астам жас білімін, шеберлігін, тапқырлығы мен командалық рухын сынайды. Бүгінгі шараның Отанға қызмет етудің нағыз үлгісіне айналған Халық қаһарманы Ғазиз Байтасовтың құрметіне арналуы ерекше мәнге ие. Бүгінгі таңда елімізде «Құқық және тәртіп» идеологиялық тақырыбы ерекше мәнге ие. Ол әрқайсымыздан басталады – ережелерді сақтаудан, өзгелерді құрметтеуден және өз іс-әрекетіміз үшін жауапкершілік алудан. Сондықтан жол қозғалысы жас инспекторлары қозғалысы өскелең ұрпақты тәрбиелеуде маңызды рөл атқарып отыр. Сіздердің бүгінгі білімдеріңіз бен тәжірибелеріңіз – ертеңгі қауіпсіз қоғамның берік негізі. Сіздерге әділ күрес, жарқын жеңістер, жаңа достар және ұмытылмас тәжірибе тілеймін», – деді аймақ басшысы Құмар Ақсақалов.
Жас жол инспекторлары – қауіпсіздік мәдениетін қалыптастырып, жол қозғалысы ережелерін құрдастары арасында насихаттап жүрген белсенді буын. Бүгінде елімізде «Заң мен тәртіп» идеологемасы ерекше маңызға ие болып отыр.Қостанай облысында 3,5 мыңға жуық мектеп оқушысының басын қосқан 325 жас жол инспекторы отряды жұмыс істейді. Он күн бойы жас инспекторларды жарыстар ғана емес, сонымен қатар мазмұнға толы мәдени-танымдық бағдарлама да күтіп тұр.
Балалар жол қозғалысы ережелерін үйреніп, құрдастары арасында қауіпсіз мінез-құлық мәдениетін қалыптастыруға көмектеседі. Облыстағы білім беру мекемелерінде балалардың қауіпсіздігін қамтамасыз етуге биыл 2,5 млрд теңге бөлінген.
Биылғы жиынға Қазақстанның 20 аймағынан келген өкілдер, сондай-ақ ТМД елдерінің командалары қатысып отыр. Негізгі байқаулар мен жарыстар облыс орталығынан 48 шақырым жерде орналасқан Алтынсарин ауданындағы «Орленок» сауықтыру орталығының базасында өтеді.
Халықаралық қатысушылардың арасында Минскіден келген «Қауіпсіздік аралы» қозғалысының жас инспекторлар командасы бар. Команда 2026 жылы Беларусьте өткен Жастар жол қозғалысы инспекторларының республикалық жиынында жеңіске жетіп, енді өз елін Қазақстанда таныстырады.
— Әрине, біз мұнда жеңіс үшін жарысуға келдік, бірақ біз үшін басқа қатысушылармен танысу да маңызды. Әртүрлі елдерден келген балалар бас қосып, араласып, бір-бірімен уақыт өткізгені өте құнды, – деп бөлісті қатысушылар.
Жасақтың өзі 2009 жылдан бері жұмыс істеп келеді: кейбір оқушылар бірнеше жылдан бері қатысып жүр, ал басқалары өз жолын енді бастап жатыр.
Қостанай облысынан республикалық кезеңде Наурызым ауданының «Жасыл жарық» командасы қатысып отыр. Мектеп оқушылары жиынға жолдаманы аймақтық кезеңде жоғары деңгейдегі дайындық пен командалық жұмыс қорытындылары бойынша алды.
Ұйымдастырушылардың айтуынша, жиынның басты міндеттерінің бірі – мектеп оқушыларының құқықтық сауаттылығын арттыру, жол қозғалысы ережелерін насихаттау және жолда жауапкершілікті мінез-құлықты қалыптастыру.
Жиынның атауы да ерекше мәнге ие. Ол Халық Қаһарманы, полиция капитаны Ғазиз Байтасовты еске алуға арналған. Ұйымдастырушылар оның батылдығын, қызметке берілгендігін және іс-әрекеттерін жас ұрпаққа үлгі ретінде атайды. Ашылу салтанатында қаһарманды еске алу үшін бір минут үнсіздік жарияланды.
Шара 12–21 тамыз аралығында өтеді. Жарыстан басқа қатысушылар үшін мәдени-білім беру бағдарламасы дайындалды. Оқушылар «СарыаркаАвтоПром» машина жасау зауыты, Қостанай облысы полиция департаментінің мұражайы және Ыбырай Алтынсарин мұражайына барады. Он күндік бағдарлама қорытынды шығару және марапаттау рәсімімен аяқталады.
Бақыт ТҰРАШ, суреттер Қостанай облысы әкімінің баспасөз қызметінен алынды
